رووداو دیجیتاڵ
داهاتی ئەپڵ کەمتر بووە لە ئاستی پێشبینییەکان. کۆمپانیاکە بایی 110 ملیار دۆلاریش پشکەکانی خۆی دەکڕێتەوە.
کۆمپانیای ئەپڵ رایگەیاند، لە چارەکی یەکەمی ئەم ساڵدا 23 ملیار و 600 ملیۆن دۆلار قازانجی کردووە. کۆی داهاتەکەشی گەیشتووەتە 90 ملیار و 800 ملیۆن دۆلار.
لوکا مایێستری، بەڕێوەبەری دارایی ئەپڵ دەڵێت: "بە لەبەرچاوگرتنی متمانەمان بە داهاتووی ئەپڵ و ئەو بەهایەی لە پشکەکانمان دەیبینین، دەستەی بەڕێوەبەران بڕیاری داوە 110 ملیار دۆلار بۆ کڕینەوەی پشکەکانی کۆمپانیاکە تەرخان بکات."
بەهۆی ئەم بڕیارەوە، نرخی هەر پشکێکی کۆمپانیاکە زیاتر لە 10 دۆلار بەرزبووەوە و گەیشتە 183.20 دۆلار.
وەک پێشبینیش دەکرا، فرۆشی ئایفۆن بەهۆی گوشارەکانی چین و رکابەرییەکانی هواوییەوە 10٪ کەمبووەتەوە.
لە سێ مانگی سەرەتای ئەم ساڵدا، ئەپڵ 45 ملیار و 700 ملیۆن دۆلاری لە فرۆشتنی ئایفۆنەوە دەستکەوتووە. لە هەمان ماوەی 2023ـدا، ئەپڵ بایی 51 ملیار و 300 ملیۆن دۆلار ئایفۆنی فرۆشتبوو.
جاکۆب بۆرن، شرۆڤەکاری بازاڕ لە دامەزراوەی Emarketer بۆ توێژینەوە دەڵێت: "ئەم ساڵ ساڵێکی سەخت بووە بۆ ئەپڵ. لەو ساڵە وەک گرانترین کۆمپانیای جیهان و گەورەترین دروستکردنی مۆبایلی زیرەک نەمایەوە." گوتیشی: "کەمبوونەوەی خواست لەسەر ئایفۆن لە چین داهاتی ئەپڵی بەشێوەیەکی بەرچاو کەم کردووەتەوە".
شارەزایان زیادبوونی داهاتەکانی هواوی بە هۆکاری سەرەکیی کەمبوونەوەی فرۆشی ئایفۆن دادەنێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ