سووتاندنی دوو ئۆتۆمبێل لە خۆپێشاندانەکانی فەرەنسا. وێنە: AFP
رووداو دیجیتاڵ
بۆ چوارەم شەو خۆپێشاندان لە شاری بۆردۆ لە فەرەنسا بەرامبەر کوشتنی ناهێلی تەمەن 17 ساڵ لەلایەن پۆلیسەوە بەردەوامبوو.
لە سەرتاسەری فەرەنسا، سەدان هەزار خۆپێشاندەر و 45 هەزار پۆلیس بە بەرد، یاری ئاگرین، گازی فرمێسکرێژ و گولـلەی پلاستیکی رووبەڕووی یەکتربوونەتەوە.
جیراڵد دارمامین، وەزیری ناوخۆی فەرەنسا گوتی: "45 هەزار پۆلیس و هێزی ئەمنی شەوی هەینی لەسەر شەقامەکان بوون. لەکاتێکدا شەوی پێنجشەممە 40 هەزار پۆلیسی لێبوو."
خۆپێشاندەران تەنیا رووبەڕووی پۆلیس نابنەوە، بەڵکو هەڵدەکوتنە سەر شوێنی تایبەت و گشتی و قوتابخانە و نەخۆشخانەکان.
ڤیدیۆیەکی دیکەی شەڕ و پێکدادانی پۆلیس و خۆپێشاندەران لە پاریس؛ شەوی رابردوو گەنجێکی دیکە گیانی لەدەستدا#FranceRiots #فرنسا pic.twitter.com/pvOycbFWEi
— Rudaw (@Rudawkurdish) July 1, 2023
هەندێکیان دەسووتێنن و هەندێکیشیان تاڵان دەکەن. بەرپرسانی فەرەنسا دەڵێن، ئەو گێرەشێوێنییە هاوسۆزی نییە بۆ مردنی گەنجە جەزائیرییەکە و ئەوپەڕی هەوڵ بۆ هێورکردنەوەی دۆخەکە دەدەن.
پاتریک جاری، سەرۆکشارەوانی نانتێر دەڵێت، "پێویستە پاڵپشتی خێزانەکەی بکەین. پاڵپشتی دایکی بکەین کە کوڕەکەی بەخاک دەسپێرێت. لە هەمان کاتدا، پێویستە دڵتەنگی خۆمان بۆ هەموو ئەو خەڵکانە دەربڕین کە بەهۆی تووندوتیژییەکەوە زیانیان بەرکەوتووە."
وەزارەتی ناوخۆی فەرەنسا دەڵێت، دوو لەسەر سێی خۆپێشاندەران زۆر گەنجن. باس لەوەش دەکەن، تەنیا شەوی هەینی هەزار و 311 کەسیان دەستگیرکردووە.
ئەمە جگە لەو 917 دەستگیرکراوەی شەوانی پێشتر کە تۆمەتبارن بە تاڵانکردنی هەزاران دووکان، کردنەوەی 5000 ئاگر، سووتاندنی 2000 ئۆتۆمبێل و 500 باڵەخانە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ