وێنە و ڤیدیۆ؛ کیم کارداشیان میوانە تایبەتەکەی ریال مەدرید بوو

 

 

کارداشیان چەند رۆژێک لەمەوبەر، چووە ماڵی ڤینیسیۆس جونیۆر و لەوێ چاوی بەو یاریزانە و ئێداورد کاماڤینگای فەرەنسی و یاریزانی ئەو یانەیە کەوت.

 

رۆژی دوای ئەوە کیم سەردانی مەشقەکانی ریال مەدریدی کرد و لە نزیکەوە هەموو یاریزانەکانی ئەو یانەیەی بینی.

 

شەوی سێشەممە لە یاریی گەڕی دووەمی رکابەرییەکانی خولی تۆپی پێی ئیسپانیا بەرامبەر یانەی ڤایادۆلید، کیم کارداشیان لەنێو یاریگەی سانتیاگۆ بێرنابیۆ بوو و لەلایەن فلۆرێنتینۆ پێرێز، سەرۆکی یانەی ریال مەدریدیشەوە پێشوازیی لێکرا.

 

ریال مەدرید لە راگەیێنراوێکی فەرمیدا نووسیوویەتی "کیم کارداشیان ئامادەی یاریی یانەکەمان بەرامبەر ڤایادۆلید بوو و دوای ئەوەش لەگەڵ فلۆرێنتینۆ پێرێز، سەرۆکی یانەکە چاویان بەیەکدی کەوت و وێنەی یادگاریان بەیەکەوە گرت."

 

کیم کارداشیان، چەند وێنە و ڤیدیۆیەکی خۆی و منداڵەکانی لەگەڵ ئەستێرەکانی یانەی ریال مەدرید لە ستۆری ئینستاگرامەکەی بڵاوکردووەتەوە و لەسەر وێنەکەی لەگەڵ ڤینیسیۆس جونیۆر نووسیوویەتی "تۆ باشترینی."

 

جگە لەوەش منداڵەکانی کارداشیان لە دوای یاریی ریال مەدرید و ڤایادۆلید لەنێو یاریگەی بێرنابیۆ یاری لەگەڵ ڤینیسیۆس جونیۆر دەکەن.

 

لە یارییەکەدا ریال مەدرید بە سێ گۆڵی بێبەرامبەر سەرکەوتنی بەدەستهێنا و یەکەم بردنەوەی لەم وەرزەی رکابەرییەکانی لالیگادا تۆمارکرد.