ڤیدیۆ؛ ئەڵمانیا دوایین تاقیکردنەوە بۆ ئاستی خۆی بەرامبەر سویسرا دەکات

 

ئەڵمانیا دوو یاریی سەرەتای لە یۆرۆدا بردەوە، هەڵبژاردەکە بەباشترین ئاستەوە دەرکەوت، یەکەم هەڵبژاردە بوو گەیشتە قۆناخی شازدە و بۆ یەکەمجار لە مێژووشدا هەڵبژاردەکە لە قۆناخی کۆمەڵەکاندا لە دوو یاریی سەرەتادا 7 گۆڵی تۆمارکرد.

 

مانشافت بۆ یارییەکەی بەرامبەر سویسرا ئامادەیە، ئەوان سەرکەوتنیان یەکلابووەتەوە و چاوەڕواندەکرێت یولیان نایگێلسمان چەند گۆڕانکارییەک لە پێکهاتەکەیدا بکات، بەڵام لەگەڵ ئەوەشدا چاوی لە بردنەوەی سێیەمی لەسەریەکە و دەیەوێت بە سێ بردنەوەی لەسەریەک لە قۆناخی شازدەدا دەربکەوێت.

 

سویسرا دەکرێت بۆ ئەڵمانیا تاقیکردنەوەیەکی زۆرباش بێت، بۆ ئەوەی نایگێلسمان زیاتر و باشتر لە توانای تیپەکەی تێبگات و ئەو بۆشایانەی لە تیپەکەدا هەن بۆ قۆناخی داهاتوو پڕبکاتەوە.

 

هەڵبژاردەی سویسرا بەبردنەوەیەک و یەکسانبوون خاوەنی چوار خاڵە و لە پلەی دووەمی ریزبەندی کۆمەڵەی یەکەمە، ئەوان بە رێژەیەکی زۆر سەرکەوتنیان بۆ قۆناخی داهاتوو یەکلابووەتەوە، بەڵام بەرامبەر ئەڵمانیا دەیانەوێت تاقیکردنەوە ئاڵۆزەکە بە ئەنجامێکێ ئەرێنی تێبپەڕێنن.

 

سویسرا خاوەنی یاریزانی زۆرباشە و لە دوو یاریی رابردووشدا ئاستی هەڵبژاردەکە سەرنجی زۆری بەلای خۆیدا راکێشاوە، ئەوان بەرامبەر میوانداری یۆرۆ بە ئارامییەکی باشترەوە یارییدەکەن و بە متمانە بەخۆبوونەوە رووبەڕووی ئەڵمانیا دەبنەوە.

 

وڵاتە ئارامەکەی جیهان، لەسەر ئاستی تۆپی پێش بە ئارامی کاردەکات و دەیەوێت هەر بەو ئارامییەش تاوەکو دوورترین قۆناخەکانی یۆرۆ لەسەر هەنگاوەکانی بەردەوامبێت.