رووداو دیجیتاڵ
دێنیز ئونداڤ، هێرشبەری کوردی یانەی شتوتگارت، مێژوویەکی گەورەی تۆمارکرد و لەنێو یاریگە سانتیاگۆ بێرنابیۆ گۆڵی لە ریال مەدرید کرد، بەڵام یانەکە لە یەکەم دەرکەوتنیدا لە چامپیۆنزلیگدا دۆڕا.
ریال مەدرید و شتوتگارت لە سانتیاگۆ بێرنابیۆ رووبەڕووی یەکبوونەوە، لەنیوەی یەکەمدا یانە ئەڵمانییەکە بەربەستی زۆری خستە بەردەم یانە ئیسپانییەکە و هیچ گۆڵێک نەکرا.
لە سەرەتای نیوەی دووەمدا، کیلیان ئێمباپێ گۆڵی پێشکەوتنی تۆمارکرد.
زۆری نەبرد، دێنیز ئونداڤ، هێرشبەری کوردی یانەی شتوتگارت ئەنجامەکەی یەکسانکردەوە، ئەم گۆڵە هەموو کوردێکی دڵخۆشکرد و هەر زوو سۆشیاڵ میدیای تەنی، ئەوانەشی هاندەری ریال مەدریدن دڵیان پێی خۆشبوو.
لە خولەکی 75 دێنیز ئونداڤ، لە یارییەکەدا گۆڕانکاریی پێکرا و لەنێو رێزگرتنێکی زۆری هاندەرانی یانەی ئەڵمانییەکە یاریزانەکە لە یاریگە چووە دەرەوە.
دوای ئەوە ئەنتۆنیۆ رۆدریگێر و ئێندریک، دوو گۆڵی دیکەیان بۆ ریال مەدرید تۆمارکرد، یارییەکە بە سێ گۆڵ بەرامبەر گۆڵێک لە بەرژەوەندی ریال مەدرید کۆتاییهات و یانەی شاهانە یەکەم سەرکەوتنی بەدەستهێنا.
ئونداڤ، بەرامبەر یانەی ریال مەدرید 75 خولەک یارییکرد، 23 جار قاچی بەر تۆپ کەوت، 3 لێدانی بەشێوەیەکی گشتی هەبوو، یەک لێدانی بۆ گۆڵ بوو و گۆڵێکی تۆمارکرد.
یاریزانە کوردەکە 12 پاسی دروستی هەبوو لە کۆی 16 پاس و 2 هەلی راستەقینەی بۆ هاوڕێکانی دروستکرد، لە یارییەکەدا هەڵسەنگاندنەکەی 7.7 بوو و یەکێک بوو لە باشترین یاریزانەکانی یارییەکە.
ئونداڤ خەڵکی روهای باکووری کوردستانە، یاری بۆ هەڵبژاردەی ئەڵمانیا دەکات، لە ماوەی چەند هەفتەی رابردوودا چەندجارێک بە ئاڵای کوردستانەوە دەرکەوت و پێشتر کاتێک هەڵبژاردەی تورکیا داوایکرد یارییان بۆ بکات گوتی من کوردم و دەمەوێت یاری بۆ هەڵبژاردەی ئەڵمانیا بکات.
لە هاوینی ئەمساڵ یاریزانە کوردەکە بەرامبەر 26 ملیۆن یۆرۆ، گرێبەستێکی لەگەڵ یانەی شتوتگارت واژۆکرد، لەکاتێکدا وەرزی رابردوو بەشێوەی خواستن لەو یانەیە بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ