ناپۆلی دەیەوێت رۆژانی زێڕینی مارادۆنا بگەڕێنێتەوە

 

کاتێک وەرز دەستیپێکرد، کەمبوون ئەو یانانەی چاوەڕێی درەوشانەوە و گەیشتن بە نازناوەکانیان لێدەکرا.. میلان پاڵەوان بوو و دەبوو هەمووان بڵێن، میستەر پیۆلی کار بۆ هێشتنەوەی نازناوەکە لای خۆی دەکات.. ئینتەر سەقامگیر بوو و دەبوو وەک گەورەیەک تەماشا بکرێت.. ئالێگری لە یوڤێنتوس بوو و ئەو پیاوەی مێژووی بۆ خانمە پیرەکە نووسییەوە، دەبوو لێکدانەوەی تایبەتی بۆ بکرێت.. بەڵام کەم کەس هەبوو بوێریی ئەوەی تێدا بێت بڵێ ئەی ناپۆلی؟

 

تیپێک بە کۆمەڵێک گۆڕانکاری گەورەوە وەرزەکەی دەستپێکرد و وەک بەشێک لەو مێژووە تەماشا دەکرا کە چەندین ساڵە لە شوێنی خۆیدا دێت و دەچێت و ناتوانێ هیچ بکات.. هەندێکجار رادەپەڕێت و لە کۆتاییدا دەبێت بەژێر دەست و پێی ئەو یانانەوە کە بەسەریدا تێدەپەڕن و ئەو لە نێو شکستەکانی خۆیدا جێدەهێڵن.. بەڵام ئێستا ناپۆلی دەڵێ نەخێر، هەموو ئەوەی بیرتان لێدەکردەوە، تەنیا خەیاڵێک بوو کە لە رابردووەوە سەرچاوەی گرتبوو. ئەوەی ئێستا هەیە جیاوازە و ناوازەیە.

 

دوای هەژدە یاری و چەندین رووبەڕووبوونەوەی قورس و هەڵچوون و داچوون، ناپۆلی جارێکی دیکە دووپاتیدەکاتەوە، ئەمساڵ وەک پار و وەک ساڵانی پێشوو نابێت.. ئەمساڵ هەموو شت جیاوازە و هەموو ئەگەرێکیش کراوەیە.. ناپۆلی کە ئەمساڵ تەنیا یەکجار شکستی هێناوە.. لە هەفتەکانی سێیەم و چوارەمی خولەکەدا لەلایەن رکابەرەکانییەوە ستۆپی پێکرا و ئەو بردنەوەی دایە دەم بردنەوە تاوەکو لە وێستگەی ئینتەرمیلاندا دووچاری یەکەم شکست بوو.. بەڵام هەفتەی پێشوو کاتێک هەمووان کەوتن و ئەو بردنەوەی بەدەستهێنا، ئیدی دووپات بووەوە هەموو رێگەکان ئەمجارە دەچنەوە باشوور و دەچنەوە بەردەم ئەو شارە یەکەمجار دیێگۆ ئارماندۆ مارادۆنا، بەدونیای ناساند.

 

سەرکەوتنی گەورەی ناپۆلی بەسەر یوڤێنتوسدا تەنیا دووپاتکردنەوەی ئەو راستییە بوو کە ئەوەی ناپۆلی بەدەستیهێناوە تاوەکو ئێستا، رێکەوت نییە، بەرهەمی کار و تاکتیکی قورسە لە خولێکدا کە تاکتیک تێیدا زۆر قورسە.. ناپۆلی ئێستا پاش ساڵانێکی زۆر لە چاوەڕوانی، خۆی لە پێشەنگی سێریا ئەیدا دەبینێتەوە و لە رکابەرییەکانەوە دوورە.. ئەوەی هەیە، دەکرێ لە کۆتاییدا ببێتە سەرەتای بەدیهاتنی ئەو خەونەی کە لە دوای رۆژە زێڕینەکانی مارادۆناوە بەدینەهاتوون.