دۆرتموند رێگەی بەبردنەوەی بایرن نەدا و ئەڵۆنسۆش بەهێزەوە چووە نێو بوندێسلیگا

 

 

لیۆن گورێتسکا بەلێدانێکی بەهێز گۆڵی پێشکەوتنی بۆ بایرن میونشن تۆمارکرد و نیوەی یەکەم بەو گۆڵە کۆتاییهات.

 

لە سەرەتای نیوەی دووەمدا لێرۆی سانێ گۆڵی دووەمی تۆمارکرد و دۆرتموندی خستە بارودۆخێکی خراپەوە، بەڵام فێستیڤاڵن خۆی بەدەستەوە نەدا.

 

یوسوفا مکوکو بووە بچووکترین یاریزان لە تەمەنی 17 ساڵیدا لە دێر کلاسیکێردا گۆڵ بکات و ئەنجامەکەی بۆ خاوەن یاریگە کەمکردەوە.

 

لە خولەکی 90 کینگێسلی کۆمان لە بایرن میونشن بەکارتی سوور کرایە دەرەوە، ئەمەش هەلێکی گەورەی دایە دۆرتموند بۆ یەکسانکردنەوەی ئەنجامەکە و لە خولەکی 95 ئانتۆنی مۆدێست، بەلێدانی سەر خەونی باڤارییەکانی بۆ بردنەوەی یارییەکە لەنێو برد و ئەنجامەکەی بۆ خاوەن یاریگە یەکسانکردەوە.

 

بەم گۆڵە بایرن و ئۆلیڤەرکان کەوتنە دۆخێکی خراپەوە و سینگاڵ ئیدۆنا پارکیش پڕبوو لە خۆشی و ئاهەنگ.

 

چابی ئەڵۆنسۆ کاروانی راهێنەرایەتیکردنیی لە ئەڵمانیا و لەگەڵ بایر لیڤەرکوزن بەبردنەوەیەکی گەورە دەستپێکرد و بە چوار گۆڵی بێبەرامبەر لە شالکەیان بردەوە.

 

لە خولەکی 38 موسا دیابی بەلێدانێکی بەهێز گۆڵێکی تۆمارکرد، ئەڵۆنسۆ و هاندەرانی بای ئارێنای دڵخۆشکرد.

 

دوای تەنیا دوو خولەک جێرمی فریمپۆنگ گۆڵی دووەمی تۆمارکرد و پێکهاتەی چابی بە ئارامییەوە نیوەی یەکەمی تەواوکرد و دڵخۆشیی ئەڵۆنسۆش گەیشتە لووتکە.

 

هەشت خولەک دوای دەستپێکردنی نیوەی دووەم فریمپۆنگ گۆڵی دووەمی خۆی و سێیەمی بایرلیڤەرکوزنی تۆمارکرد.

 

لە دوایین خولەکەکانی یارییەکەدا پاوڵینیۆ گۆڵی چوارەمی تۆمارکرد و یارییەکە بە ئەنجامێکی گەورە بۆ بایرلیڤەرکوزن کۆتاییهات، یەکەمجارە یانەکە لەم وەرزەدا 4 گۆڵ بکات و دووەم بردنەوەی یانەکەیە لە 9 گەڕی بوندێسلیگادا.