رووداو دیجیتاڵ
لە یارییەکی سەرنجڕاکێشدا لە خولی ئەستێرەکانی عێراق، یانەی دهۆک لە دەرەوەی یاریگەی خۆی بە ئەنجامی 2-1 لە کەربەلای بردەوە و کۆی خاڵەکانی گەیاندە 21 خاڵ.
یانەی دهۆک لە گەڕی سیانزەیەمی خولی ئەستێرەکانی عێراق، لە دەرەوەی یاریگەی خۆی رووبەڕووی یانەی کەربەلا بووەوە.
لە خولەکی 9، پاشەنگ عەبدوڵا، دوای جووڵەیەکی نایاب، گۆڵی یەکەمی بۆ یانەی دهۆک تۆمارکرد، وەڵامی یانەی کەربەلا لە خولەکی 26 بوو، کاتێک عەبدوڵا حەسون گۆڵی یەکسانبوونی بۆ یانەکە تۆمارکردەوە، هێرشی دهۆکییەکان بەردەوام بوو بۆ یەکلاییکردنەوەی یارییەکە، ئەستێرەی یانەکە، پیتەر گۆرگیس لە خولەکی 68 بە لێدانی سزا گۆڵی دووەمی بۆ یانەی دهۆک تۆمارکرد.
یانەی کەربەلا لە هەوڵەکانیان بۆ گەڕانەوە لە ئەنجامی یارییەکە بەرەوام بوون و لە خولەکەکانی کۆتاییدا گرژی لەنێوان یاریزانانی هەردوو یانە درووستبوو و لە ئەنجامدا یانیک زاکری، ئەستێرەی پیشەگەری دهۆک لە خولەکی 90 بە کارتی سوور کرایە دەرەوە.
گرژیی نێوان یاریزانەکان بەردەوام بوو و یاریزانانی یانەی کەربەلا ناڕەزایەتیی خۆیان دژی بڕیارەکانی ناوبژیوان دەربڕی، تاوەکو لە خولەکی 93، هاندەرێکی یانەی کەربەلا هێرشی کردە سەر ناوبژیوانی سێیەمی یارییەکە، حوسێن فەلاح و بە پارچەبەردێک لە سەری ئەو ناوبژیوانەیدا.
دوای ئەو رووداوە، ناوبژیوانی سەرەکی، کۆتاییهاتنی یارییەکەی بە بردنەوەی یانەی دهۆک راگەیاند و ناوبژیوانی نێودەوڵەتی حوسێن فەلاح، بە ئامبوڵانس گواسترایەوە نەخۆشخانە بۆ وەرگرتنی چارەسەری پێویست.
عەدنان دەرجال، سەرۆکی فیدراسیۆنی تۆپی پێی عێراق، دڵنیاییدا دەربارەی تەندروستیی ناوبژیوانی نێودەوڵەتی، حوسێن فەلاح و گوتی، ئەو کەسەی کە هێرشی کردووەتە سەری هاندەری کەربەلایە و لەلایەن هێزە ئاسایشپارێزەکانەوە دەستگیرکراوە.
بەم بردنەوەیە، یانەی دهۆک بە شێوەیەکی کاتی چووە پلەی شەشەمی ریزبەندی خولی ئەستێرەکانی عێراق، بەکۆکردنەوەی 21 خاڵ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ