بەرمیلە بارووتەکەی دوای ئەسەد

لە دیمەشقی دوای ئەسەد، رۆژنامەڤان و پێشکێشکاری رووداو هێڤیدار ئەحمەد گرژییە نوێیەکان و گۆڕانکارییەکانی شوێنە ئایینییە گرنگەکانی سووریا پێشاندەدات و ساتێکی هەستیار لە قۆناخی راگوزەری وڵاتەکەدا تۆمار دەکات.

ئەم بەرنامەیەی هێشتا ماویەتی بە دیمەنی کۆچکردنی خەڵک دەستپێدەکات، کاتێک خێزانە شیعەکان لە ئیدلیب هەڵدێن. ژنێک لەوانەی هەڵدێن و لەسەر سنووری نێوان سووریا و لوبنانن دەڵێت "لەبەر خەم و پەژارە رۆیشتین" و ئاشکرای دەکات چۆن گرووپە چەکدارەکان بوونەتە هۆی بەجێهێشتنی ماڵ و حاڵیان. ئەو دەڵێت "کێ دەیەوێت ماڵەکەی خۆی بەجێبهێڵێت؟ کار و ماڵمان هەبوو، هەموو شتێکمان بەجێهێشت و راماندەکرد"، بەنیازە لە رێگەی لوبنانەوە بچێتە کەربەلای عێراق. 

لە مەزارگەی سەیدە زەینەب، کە شوێنێکی پیرۆزی گرنگی شیعەکانە لە باشووری دیمەشق، بەرنامەکە گۆڕانکارییە گرنگەکانی دەسەڵات تۆمار دەکات. لەو شوێنەی کە پێشتر هێزەکانی حیزبوڵڵای پشتیوانیکراو لەلایەن ئێران کۆنترۆڵی چوونەژوورەوەیان دەکرد، ئێستا چەکدارانی دەستەی تەحریری شام ئاسایش دەپارێزن. چاودێری مەزارگەکە، شێخ ئەسعەد ئەحمەدی، نیگەرانە لە گرژییە مەزهەبییەکان و دەڵێت "ترسەکە هەیە و دەتوانم بڵێم نزیکەی 20%ە. ئەمە لەوانەیە زیاد بکات ئەگەر دەوڵەتی نوێی سووریا بە دەستێکی ئاسنین ئاسایش نەپارێزێت."

لە بەرنامەکەدا لەڕێگەی چەندین سەردان بۆ مەزارگەکە، زیادبوونی گرژییەکان ئاشکرا دەکات. لە سەردانی دووەمدا تەنیا سێ رۆژ دواتر، دۆخەکە خراپتر ببوو. خزمەتکاری مەزارگەکە دەڵێت "کەسێک هەوڵیدا ئاڵای خۆی لەسەر مەزارگەی سەیدە زەینەب هەڵبدات. شێخ ئەحمەدی لەم سەردانەدا راشکاوانەتر هۆشداری دەدات: "بەڵێ، شەڕێکی مەزهەبی گەورە روودەدات، بەتایبەتی لە نێوان سوننە و شیعە لە هەندێک ناوچە."

لە مزگەوتی ئومەوی مێژوویی لە ناوەندی دیمەشق، بەرنامەکە دینامیکی هێزی نوێ تۆمار دەکات. چەکدارەکانی دەستەی تەحریری شام نوێژ دەکەن، چەکدارێک رایدەگەیەنێت "دیمەشق بە ویستی خودا دەبێتە پایتەختی سوننەکان لە هەموو جیهان، نەک تەنیا لە شام."

گرژییەکان درێژ دەبنەوە بۆ مەزارگەی سەیدە روقەییە، لەوێش چەکدارانی دەستەی تەحریری شام پاسەوانی دەروازەکە دەکەن. چەکدارێک هەڵوێستی خۆی بە روونی دەردەبڕێت: "ئێمە هێزە شیعەکان قبووڵ ناکەین، قبووڵی ناکەین چەکیان هەبێت یان کێشە دروست بکەن. ئێرە سووریایە، نەک ئێران."

بەرنامەکە بە چەندین تێبینی لەسەر داهاتووی نادیاری سووریا کۆتایی دێت. لە پشت ئارامی پاش ئەسەدەوە، ئەوە دەردەکەوێت کە ملمانێیەکی شاراوە بەردەوامە، نەک تەنیا لەسەر خاک و دەسەڵات، بەڵکو دەگاتە پیرۆزترین شوێنەکانی وڵات. لەگەڵ هەر هەنگاوێکی نوێ لە سووریا، مەترسییەکانی دابەشبوون و ملمانێ لەسەر ناسنامەی ئەو وڵاتە و هەڕەشە مەزهەبییەکان قووڵتر دەبنەوە. ملمانێکە تەنیا لەسەر خاک و دەسەڵات نەماوە و، گەیشتووەتە پیرۆزترین شوێنەکان. وەکو بەرمیلێکی باروت وایە کە هەر ساتێک دەکرێت بتەقێتەوە.