رووداو دیجیتاڵ
بەرپرسێکی ئەمریکی رایدەگەیێنێت، ئەمڕۆ دووشەممە هێزێکی ئەمریکییەکان و هاوپەیمانان لە بنکەی سەربازیی تەنەف لە سووریا کراونەتە ئامانج، بەڵام هێرشەکە هیچ زیانێکی گیانی و مادیی نەبووە.
رۆژی دووشەممە، 23ـی تشرینی یەکەمی 2023، بەرپرسێکی وەزارەتی بەرگریی ئەمریکا بە میدیای وڵاتەکەی راگەیاندووە، "بەرەبەیانی ئەمڕۆ لە سووریا هێرش کراوەتە سەر هێزە ئەمریکییەکان و هێزەکانی هاوپەیمان؛ هیچ کەسێک گیانی لەدەست نەداوە و هیچ کەسێکیش بریندار نەبووە".
دوای هێرشەکەی سەر بنکە سەربازییەکە، گرووپێکی چەکداری بەناوی "مقاوەمەی ئیسلامیی عێراقی" بەرپرسیاریێتی خۆی لە هێرشەکە راگەیاند.
دوای دەستپێکردنی شەڕی نێوان چەکدارانی بزووتنەوەی حەماس و سوپای ئیسرائیل لە 7ـی ئەم مانگە و پاڵپشتیکردنی ئیسرائیل لەلایەن ئەمریکییەکانەوە، گرووپە چەکدارەکانی نزیک لە ئێران بەردەوام هەڕەشەی ئەوە دەکەن لە هێزەکانی ئەمریکا لە ناوچەکە بەئامانج دەگرن.
رۆژی 22-10-2023 سەرچاوەیەکی سەربازی لە بنکەی سەربازی عەین ئەسەد بە تۆڕی میدیایی رووداوی راگەیاند: "بەرەبەیانی ئەمڕۆ نزیکەی کاژێر 01:30، هێرشکرایە سەر بنکەی ئاسمانیی عەین ئەسەد".
لە 18ـی تشرینی یەکەمەوە، هێزەکانی ئەمریکا و هاوپەیمانیی نێودەوڵەتیی دژی داعش لە بنکەی ئاسمانیی عەین ئەسەد لە ئەنبار، بنکەی ئاسمانیی هەریر لە شاری هەریری سەر بە پارێزگەی هەولێر و لە بنکەیەکی سەربازیی نزیک فڕۆکەخانەی بەغدا، رووبەڕووی هێرش بوونەتەوە.
لە کۆتایی ساڵی 2021، عێراق رایگەیاند ئەرکی هێزە شەڕکەرە بیانییەکان لە وڵاتەکەی کۆتایی هاتووە و ئەرکی هاوپەیمانیی نێودەوڵەتی گۆڕاوە بۆ راوێژپێدان و مەشقپێکردنی هێزە نێوخۆییەکان. لەو چوارچێوەیەشدا، دوو هەزار و 500 سەربازی ئەمریکی و هەزار سەربازی دیکەی هاوپەیمانیی نێودەوڵەتی لە سێ بنکەی سەربازی و ئاسمانیی عێراق و هەرێمی کوردستان ماون.
ویلایەتە یەکگرتووەکانی ئەمریکا چەندینجار دووپاتیکردوەتەوە بە هەموو شێوەیەک پاڵپشتی لە ئیسرائیل دەکات بۆ سەرکەوتنی لەو ئۆپەراسیۆنە سەربازییەدا کە تەلئەڤیڤ دەڵێت، ئامانج لێی کۆتاییهێنانە بە دەسەڵاتی حەماس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ