وەزیری دەرەوەی ئێران لەگەڵ بەرپرسانی سووریا دۆخی ناوچەکە تاوتوێ دەکات

 

 

بەیانیی ئەمڕۆ شەممە 05-10-20247 عەباس عێراقچی، وەزیری دەرەوەی ئێران بە سەردانێکی فەرمی گەیشتە دیمەشقی پایتەختی سووریا و بڕیارە لەگەڵ بەرپرسانی باڵای وڵاتەکە کۆببێتەوە.

 

بەگوێرەی راگەیێندراوێک کە وەزارەتی دەرەوەی ئێران بڵاوی کردووەتەوە، یەکێک لەو بابەتانەی لە کۆبوونەوەکاندا دەخرێتە بەر باس، دۆخی ناوچەکە دەبێت.

 

سەردانەکەی عێراقچی بۆ سووریا لەکاتێکدایە، دوێنێ سەردانی بەیرووتی کرد و لەگەڵ بەرپرسانی لوبنان کۆبووەوە.

 

وەزیری دەرەوەی ئێران دوای کۆبوونەوەکە لە کۆنفرانسێکی رۆژنامەڤانیدا رایگەیاند، ئێران لەگەڵ راگەیاندنی ئاگربەستە لەنێوان حیزبوڵڵا و ئیسرائیل و "لەو بارەیەوە لەگەڵ بەرپرسانی لوبنانی قسەم کرد. لەگەڵ وڵاتانی دیکەش لە پەیوەندیداین بۆ ئەوەی ئاگربەست رابگەیێندرێت، بەڵام دەبێ مافی خەڵکی لوبنانی تێدا پارێزراو بێت؛ هەروەها دەبێت ئاگربەستەکە لە لایەن بەرەی موقاوەمە پەسندبێت و هاوکات بێت لەگەڵ ئاگربەست لە غەززە."

 

چەند هەفتەیەکە گرژییەکانی ناوچەکە زیادیان کردووە. 27ـی ئەیلوول ئیسرائیل بارەگای سەرەکیی حیزبوڵڵای لوبنانی لە بەیرووت بۆردوومانکرد کە بووە هۆی کوژرانی حەسەن نەسروڵڵا، ئەمینداری گشتیی بزووتنەوەکە و عەباس نیلفرووشان، بەرپرسی دۆسیەی لوبنان لە سوپای پاسداران.

 

ئێرانیش لە 1ـی تشرینی یەکەم بە 180 مووشەک هێرشی کردە سەر ئیسرائیل و هۆشداریشی دا کە ئەگەر ئیسرائیل وەڵامی هێرشەکە بداتەوە، کاردانەوەی ''زۆر تووندتر'' دەبێت.