کورتەباڵایەکی سلێمانی خەڵاتی باڵیۆزی خاوەن پێداویستیی تایبەت لە بەغدا وەردەگرێت

 

 

رۆژی سێشەممە 14-12-2021، عومەر جەبار، سەرۆکی کۆمەڵەی کورتەباڵاکانی هەرێمی کوردستان بە تۆڕی میدیایی رووداوی راگەیاند، "تەنیا من خەڵات نەکراوم، خەڵکانی دیکەش خەڵات کران، بەڵام من جیاوازتر بوو لەوان و یەکەم کەسیش بووم خەڵات کرام".

 

خەڵاتکردنەکە لە شاری بەغدا و لە رێوڕەسمێکدا بووە، کە لەلایەن رێکخراوی کۆمکاری رێکخراوەکانی خاوەن پێداویستیی تایبەتەوە لە عێراق سەرپەرشتی کراوە، تێیدا وەزیری کار و کاروباری کۆمەڵایەتیی عێراق، راوێژکارێکی مستەفا کازمی، سەرۆکوەزرانی عێراق و چەندین بەرپرسی عێراق بەشدارییان کردووە.

 

عومەر جەبار گوتیشی، "رێوڕەسمەکە بەبۆنەی رۆژی جیهانیی خاوەن پێداویستیی تایبەتەوە رێکخرابوو". 

 

لەگەڵ عومەر کورتەباڵا، کورتەباڵایەکی دیکەش لە دهۆک بەناوی وەحید سەعید کە لەدایکبووی 1986ـە و فەرمانبەری بەڕێوەبەرایەتیی گشتیی تەندروستیی دهۆکە، خەڵاتەکەی پێبەخشراوە. 

وەحید سەرۆکی کۆمەڵەی کورتەباڵاکانی دهۆکە و ئەندامی فیدراسیۆنی کورتەباڵاکانی جیهانە.