رووداو دیجیتاڵ
کۆنترۆڵی جۆریی هەوای تاران رایگەیاند، لە 9 مانگ و 20 رۆژی رابردوودا هەوای شارەکە تەنیا پێنج رۆژ پاک بووە.
ئەمڕۆ چوارشەممە، 8ـی کانوونی دووەمی 2025، کۆنترۆڵی جۆریی هەوای تارانی پایتەختی ئێران بڵاویکردەوە، لە نەورۆزەوە تەنیا 5 رۆژ هەوای شارەکە پاک بووە.
بەپێی راگەیێندراوی کۆنترۆڵی جۆریی هەوای تاران، لەو ماوەیەدا هەوای تاران بەهۆی بەرزبوونی رێژەی گەردیلە زیانبەخشەکانەوە 95 رۆژ بۆ خەڵکی وەک نەخۆش، منداڵان و بەساڵاچووان ناتەندروست بووە، 15 رۆژیش هەواکەی بۆ هەموو هاووڵاتییان ناتەندروست بووە و 179 رۆژیش هەواکەی پیس بووە، بەڵام زۆر نا.
کۆنترۆڵی جۆریی هەوای تاران دەڵێت، بەراورد بە پار، پیسبوونی هەوا لە تاران زیادیکردووە، بەشێوەیەک کە پار لە هەمان ماوەی دیاریکراودا تاران 9 رۆژ هەوای پاکی هەبووە، 82 رۆژ هەوای شارەکە بۆ خەڵکی وەک نەخۆش و منداڵ و بەساڵاچوو ناتەندروست بووە، 11 رۆژیش بۆ هەموو هاووڵاتییان ناتەندروست بووە؛ لە 192 رۆژدا هەوای شارەکە پیس بووە، بەڵام زۆر نا.
کۆنترۆڵی جۆریی هەوای تاران دەڵێت، ئەمڕۆ چوارشەممە هەوای شارەکە پیسە و بۆ خەڵکی وەکو نەخۆش و منداڵ ناتەندروستە و هەر بەو هۆیەوە، بە بڕیاری کەمالەدین میرجەعفەریان، جێگری پارێزگاری تاران، ئەمڕۆ لە قوتابخانەکانی قۆناخی بنەڕەتی پشووە.
سووتاندنی مازۆت لە وێستگەکانی کارەبا و کارگەکان، ژمارەی زۆری ئۆتۆمبێلەکان، کوالێتیی خراپی بەنزین و ئۆتۆمبێلەکان بە هۆکاری سەرەکیی زیاتر پیسبوونی هەوای ئێران دادەنرێن.
بەپێی راپۆرتی وەزارەتی تەندروستیی ئێران، ساڵانە 50 هەزار کەس لەو وڵاتە بەهۆی کاریگەرییەکانی پیسبوونی هەواوە گیان لەدەست دەدەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ