لە ئێران سزای هاتووچۆ زیادکرا

 

بەپێی میدیای فەرمیی ئێران، رۆژی سێشەممە، 4ی حوزەیرانی 2024، کابینەی حکومەتی ئەو وڵاتە بڕیارەکەی پەسند کردووە و لە لایەن نووسینگەی محەممەد موخبر، سەرپەرشتیاری سەرۆککۆماریی ئێرانەوە بۆ وەزارەتەکانی ناوخۆ، داد، رێگەوبان و شارسازی نێردراوە.

 

بەو بڕیارە نوێیە، هەندێک سزای هاتووچۆ بەراورد بە ساڵی پار لە نێوان دوو تا چوار هێندە زیاد کراون.

 

بەپێی ئەو زانیارییانەی بڵاوکراونەتەوە، بەکارهێنانی خواردنەوە کحولییەکان لە کاتی لێخوڕینی ئۆتۆمبێل 1.5 ملیۆن تمەن سزای بۆ دیاریکراوە کە زیاتر لە چوار هێندەی سزای پێشووە، بۆ خێرا لێخوڕینیش لە نێوان 100 هەزار تاوەکو 500 هەزار تمەن دیاریکراوە.

 

هەروەها سزای بەکارهێنانی مۆبایل لە کاتی لێخوڕین لە نێوان 100 هەزار بۆ 400 هەزار تمەنە، سزای راگرتنی ئۆتۆمبێل لە شوێنی قەدەخەکراو 100 هەزار تمەنە، نەوەستان لە چرای سووری ترافیکلایت سزاکەی 250 هەزار تمەن، سزای نەبوونی بیمە 150 هەزار تمەنە، سزای پێشکەوتنەوە لە شوێنی رێگەپێنەدراو 700 هەزار تمەنە.

 

سەید تەیمور حوسێنی، بەڕێوەبەری پۆلیسی هاتووچۆی ئێران، رۆژی چوارشەممە 05-06-2024 رایگەیاند: "زیادکردنی سزای هاتووچۆ لەلایەن سەرپەرشتیاری سەرۆککۆماریی ئێران راگەیێندرا و لە چەند رۆژی داهاتوودا لە رۆژنامەی فەرمیدا بڵاودەکرێتەوە پێدەچێت لە سەرەتای مانگی تەمموزەوە نرخە نوێیەکانی سزاکانی هاتووچۆ جێبەجێ بکرێن."

 

بە گوتەی حوسێنی، دەبێ سزاکانی هاتووچۆ لە سیستمی ئەلیکترۆنی پۆلیسی هاتووچۆدا جێگیر بکرێت و ئامادەکارییەکانیان بۆ ئەو مەبەستە دەستیپێکردووە.