رووداو دیجیتاڵ
بەرپرسانی تەندروستیی ئێران دەڵێن، ژمارەی ئەو کەسانەی لە سێ پارێزگای ئەو وڵاتە بەهۆی خواردنەوەی کحولی ساختەوە گیانیان لەدەستداوە بۆ 26 کەس بەرزبووەتەوە.
عەباس نەجەفی، داواکاری گشتیی هەمەدان رۆژی چوارشەممە رایگەیاند، بەهۆی خواردنەوەی کحولی ساختەوە 18 کەس لە هاووڵاتییانی ئەو پارێزگایە ژەهراویبوون و گوێزراونەتەوە نەخۆشخانە و دواتریش 4 کەسیان گیانیان لەدەستداوە.
بە گوێرەی میدیای فەرمیی ئێران، 32 کەسیش بەهۆی خواردنەوەی کحولی ساختەوە لە پارێزگای گیلان ژەهراوی بوون.
محەممەدتەقی ئاشووبی، سەرۆکی زانکۆی پزیشکیی گیلان دەڵێت، تاوەکو ئێستا 9 کەس لەو پارێزگایە گیانیان لەدەستداوە و دۆخی تەندروستیی دوو کەسی دیکەش ناجێگیرە.
هاوکات، جاوید عەباسی، بەڕێوەبەری دادپزیشکیی مازندەرانیش ئەمڕۆ رایگەیاند، 23 کەس لەو پارێزگایە بەهۆی خواردنەوەی کحولی ساختەوە گوێزراونەتەوە نەخۆشخانە؛ ئاماژەی بەوەشکرد، 13 کەس گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ