چیرۆکی ئەو منداڵەی شەش ئەندامی خێزانەکەی لە بۆردوومانێکدا گیانیان لەدەستدا
رووداو دیجیتاڵ
هەمزە تەمەنی 10 ساڵە، شەش ئەندامی خێزانەکەی لە ئەنجامی بۆردوومانێکی فڕۆکە جەنگییەکانی ئیسرائیل لە کەرتی غەززە لەدەستداوە و خۆیشی بریندارە.
هەمزە بە بریندارییەوە قسەی کرد و گوتی، "هیواخوازم هەتا زووە شەر کۆتایی بێت و بگەڕێمەوە ماڵەوە و لەگەڵ هاوڕێیانم یاری بکەم. هیواخوازم لە مانگی رەمەزانیشدا بەڕۆژوو بم و بەبۆنەی جەژنیش ئاهەنگ بگێڕین."
هەمزە لە نەخۆشخانەی شیفا دەمێنێتەوە؛ ئەویش یەکێکە لەو سەدان بریندارەی لە نەخۆشخانەکە چارەسەری بۆ دەکرێت. داپیرەی هەمزە باسی ساتی بۆردوومانەکەی سەر ماڵەکەیان دەکات و دەڵێت، "خەوتبووین کاتێک مووشەکێک بەر ماڵەکەمان کەوت. هەمزە برینداربوو، برا گەورەکەی و دایکی لەنێو شەش ئەندامی خێزانەکەیدان کە شەهیدبوون. باوکی بریندارە. ماڵەکەشیان تەختی زەوی بووە."
تادێت هێرشەکانی سەر غەززە چڕتر دەبێتەوە و بە گوێرەی ئامارە فەرمییەکان، لە 7ـی ئۆکتۆبەرەوە 1400 هاووڵاتی ئیسرائیلی کوژراون و زیاتر لە 5400 کەسی دیکە برینداربوون. لە فەلەستینیش زیاتر لە حەوت هەزار کەسیش کوژراون و زیاتر لە 18 هەزار کەسی دیکە برینداربوون.
رۆژی شەممە 28-10-2023، ئیسرائیل هێرشی زەوینی بۆ سەر غەززە دەستپێکرد و گوتەبێژی هێزی بەرگریی ئیسرائیل رایگەیاند، هێزەکانیان چوونەتە نێو کەرتەکە و لە ئاسمانیشەوە تونێلەکان بۆردوومان دەکەن. بزووتنەوەی حەماسیش گوتی، لە چەندین شوێن رووبەڕووی سوپای ئیسرائیل بوونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ