ئیسرائیل 7 فەلەستینیی بە تۆمەتی سیخوڕیکردن بۆ ئێران دەستگیر دەکات

 

 

رۆژی سێشەممە 22ی تشرینی یەکەمی 2024 پۆلیسی ئیسرائیل لە راگەیێندراوێکدا گوتی، "شین بێت [دەزگای ئاسایشی ئیسرائیل] و پۆلیسی ئورشەلیم 7 کەسی دانیشتووی بەیت سەفافەیان دەستگیر کرد."

 

پۆلیسی ئیسرائیل حەوت تۆمەتبارەکە بە "سیخوڕیکردن بۆ ئێران" تۆمەتبار دەکات و دەڵێت، "ئەو کەسانە بە سەرپەرشتی ئێران پلانیان بۆ کوشتنی زانایەکی ئیسرائیلی و سەرۆک شارەوانییەکی شارێکی ئیسرائیل دانابوو."

 

تۆمەتبارەکان تەمەنیان لەنێوان 19 ساڵ و 23 ساڵدایە و بە گوێرەی پۆلیسی ئیسرائیل، هەوڵی ئەوەشیان داوە لە چەند شوێنێک ئۆتۆمبێل بسووتێنن و هەوڵیشیان بۆ کۆکردنەوەی زانیاری هەواڵگری لەنێو ئیسرائیل داوە.

 

پۆلیس لەکاتی گەڕان لەنێو ماڵی تۆمەتبارەکان بڕی 13،000 هەزار دۆلار و ژمارەیەکی ئۆتۆمبێلی ساختەی پۆلیسی دۆزیوەتەوە.

 

رۆژی 16ی ئەم مانگە، پۆلیسی ئیسرائیل کەسێکی دیکەی بە هەمان تۆمەت دەستگیرکرد. رۆژی 19ی مانگی رابردووش، پۆلیسی ئیسرائیل کەسێکی بە تۆمەتی هەوڵدان بۆ تیرۆرکردنی بنیامین نەتەنیاهوو، سەرۆکوەزیرانی ئیسرائیل دەستگیر کرد و ئاماژەی بەوەش کرد، تۆمەتبارەکە کاری بۆ ئێران دەکرد.