سەرۆکایەتی ئەرکانی هێزە چەکدارەکانی ئێران: تۆڵەی کوشتنی هەنییە هەر دەکەینەوە

 

 

ئەمڕۆ پێنجشەممە، 19ی ئەیلوولی 2024، سەرۆکایەتی ئەرکانی هێزە چەکدارەکانی ئێران بە بۆنەی هەفتەی بیرهێنانەوەی شەڕی نێوان ئێران و عێراق کە لەو وڵاتە وەکوو هەفتەی بەرگریی پیرۆز دەناسرێت، راگەیێندراوێکی بڵاوکردەوە و تێیدا هۆشداری دەداتە ئەمریکا و ئیسرائیل.

 

لە راگەیێندراوەکەدا هاتووە: "هۆشداری دەدەینە ئەمریکای تاوانبار و دەسەڵاتە بوکەڵە ساختەکەی لە ناوچەکەدا، هەروەک چۆن لە دۆسیەی شەهیدکردنی ستەملێکراوی شەهیدانی بەرەی مقاوەمە، حاجی قاسم و هێڕشی تیرۆریستی دژی کونسوڵخانەی ئێران لە سووریا، بە تووندی تۆڵەمان کردووە و بەڵێنی راستگۆیانەی خۆمان جێبەجێ کرد، تێپەڕینی کات کاریگەری ناکاتە سەر ئیرادەی کۆماری ئیسلامی ئێران بۆ تۆڵەکردنەوەی خوێنی ئیسماعیل هەنییە."

 

سەرۆکایەتی ئەرکانی هێزە چەکدارەکانی ئێران هەروەها دەڵێت: "رژێمی منداڵکوژی زایۆنی دەبێت باجی هەڵەی گەمژانە و خراپەکارییەکانی بدات."

 

ئاماژە بە هێرشە تووند و بەردەوامەکانی ئیسرائیل بۆ سەر کەرتی غەززە و پشتیوانی ئەمریکا و وڵاتانی رۆژئاوا بۆ ئیسرائیل دەکات و دەڵێت: "ئەمە پێشانی دەدات کە هەموو جارنامە و پەیماننامە نێودەوڵەتییەکان و دامەزراوە و رێکخراوەکانی مافی مرۆڤ، بە تایبەتیش نەتەوە یەکگرتووەکان ناتوانن رێگری لە زوڵم و دڕەندەیی ئەو رژێمە بکەن و رووبەڕووی لێپرسینەوەی بکەن."

 

ئیسماعیل هەنییە، سەرۆکی پێشووی مەکتەبی سیاسی بزووتنەوەی حەماس رۆژی 31ـی تەممووزی 2024 لەدوای بەشداریکردنی لە رێوڕەسمی دەستبەکاربوونی سەرۆککۆماری نوێی ئێران، لە تاران کوژرا.

 

بەرپرسانی ئێران، ئیسرائیل بە کوشتنی هەنیە تۆمەتبار دەکەن و بەردەوام هەڕەشەی تۆڵەکردنەوەی دەکەن.