ناوەندێکی تەندروستی لە غەززە. وێنە: AA
رووداو دیجیتاڵ
پێنج هەفتەیە کەرتی غەززە لەژێر گەمارۆی ئیسرائیلدایە و کاژێر دوای کاژێریش ژمارەی کوژراو و برینداران زیاتر دەبێت.ئەویش گوشارێکی گەورەی لەسەر کەرتی تەندروستیی غەززە دروستکردووە.
تێدرۆس ئەدهانۆم، سەرۆکی رێکخراوی تەندروستیی جیهانی دەڵێت، "دۆخی غەززە بە جۆرێکە ناتواندرێت پێناسە بکرێت؛ رێڕەوی نەخۆشخانەکان پڕبوون لە بریندار و نەخۆش؛ تەرمەکان هەموویان بەسەریەکەوەن؛ نەشتەرگەری بەبێ بەنج دەکرێن؛ هەروەها دەیان هەزار ئاوارە لە نەخۆشخانەکان نیشتەجێ کراون".
36 نەخۆشخانە لەو ناوچەیەی فەلەستین هەن؛ 20یان لە پێدانی خزمەتگوزاریی تەندروستی بێبەشن. زیاتر لە ملیۆنێک و 600 هەزار کەس لەنێو غەززە ئاوارەبوون و 117 هەزاریان چوونەتە نێو نەخۆشخانەکان بە ئومێدی ئەوەی گیانیان لەوێ پارێزراو بێت.
ریاز مەنسوور، نوێنەری فەلەستین لە نەتەوە یەکگرتووەکان دەڵێت، "نەخۆشخانەکان بوونەتە ئامانجی سەرەکی ئیسرائیلییەکان؛ نەخۆشخانەکان گەمارۆدراون و دەوروبەرییان بۆردوومان دەکرێت."
بە گوێرەی ئاماری نەتەوە یەکگرتووەکان، لە حەوتی ئۆکتۆبەرەوە زیاتر لە 250 جار نەخۆشخانە و بنکە تەندروستییەکانی غەززە و کەرتی رۆژئاوا کراونەتە ئامانج.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ