رووداو دیجیتاڵ
لەگەڵ دەنگی بانگی بەیانیی ئەمڕۆ (سێشەممە، 9-5-2023) لە مزگەوتەکانی کەرتی غەززەی فەلەستین، فڕۆکەکانی ئیسرائیل چەند شوێنێکیان کردە ئامانج. وەک دەردەکەوێت ئامانجەکان لە ناوچەی سیڤیلن و ئیسرائیل دەڵێت سێ سەرکردەی سەرایا قودسی کردووەتە ئامانج و کوشتوونی.
سەرایا قودس، باڵی سەربازیی جیهادی ئیسلامییە و کوژرانی ئەو سێ سەرکردەیەی پشتڕاستکردەوە، کە پێکدێن لە جیهاد غەنام، فەرماندەی سەرایا قودس، تاریق عیزەدین و خەلیل بەهتینی، ئەندامانی ئەنجوومەنی سەربازی.
هەر لەو بەئامانجکردنەی ئیسرائیلدا، هاوژین و ژمارەیەک منداڵی ئەو سەرکردانەش کوژران؛ بەگوێرەی زانیارییە سەرەتاییەکان ژمارەیان 6 منداڵە و لانیکەم، 20 کەسی دیکەش بریندار بوون.
محەممەد ئەبوو سەلمیە، بەڕێوەبەری نەخۆشخانەی شەفا لەبارەی قوربانییانی رووداوەکە دەڵێ "ئەوانەی گەیێندراونەتە نەخۆشخانەکە، بەگوێرەی زانیارییەکانی وەزارەتی تەندروستی، 12 شەهید و لانیکەم 20 بریندارن. هێشتا دوژمنکاری بۆ سەر کەرتی غەززە بەردەوامە".
گوتەبێژێکی سوپای ئیسرائیل رایگەیاند، 40 فڕۆکەی سەربازی لە ئۆپەراسیۆ‌نێكی تایبەتدا هێرشیان کردە سەر 10 پێگەی "سەرایا قودس" و سەرجەم ئامانجەکانیان پێکا. هەروەها دەڵێ لە هێرشەکاندا چەندین کارگەی دروستکردنی مووشەک و کۆمەڵگەی سەربازی کرانە ئامانج.
حازم قاسم، گوتەبێژی بزووتنەوەی حەماس هەڕەشەی تۆڵەکردنەوە دەکات و دەڵێ "داگیرکاری زایۆنیستی ئەم بەرەبەیانییە تاوانێكی گەورەی کرد، ئەوەش بە ئامانجکردنی ماڵ و یەکەی نیشتەجێبوون و کوشتنی ژن و پیر و منداڵ و سەرکردەکانی بەرهەڵستکاری، گەلی فەلەستین وەڵامی ئەو تاوانە دەداتەوە".
میدیای ئیسرائیل رایگەیاند، هێزی ئاسمانیی ئیسرائیل دەیان سەرباز و فڕۆکەوانی یەدەگی بانگهێشت کردووە بەمەبەستی خۆئامادەکردن بۆ "هەر وەڵامێكی جیهادی ئیسلامی" بۆ سەر ئیسرائیل، گوتیشی تەلئەڤیڤ پێشبینی شەڕێکی چەند رۆژە لەگەڵ چەکدارانی سەریا قودس دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ