لە ئاکرێ کەسێک خوشکەکەی دەکوژێت و زاواکەشی بریندار دەکات

 

 

نێچیرڤان هەرکی، گوتەبێژی تەندروستیی ئاکرێ بە تۆڕی میدیایی رووداوی گوت، ئەمشەو لە سەنتەری قەزای ئاکرێ کەسێک تەقەی لە خوشک و زاوای خۆی کردووە، "11 گوللە بەر خوشکی کەوتوون و دەستبەجێ گیانی لەدەستداوە. زاواکەش بریندار بووە." 

 

تاوەکو ئێستا هۆکاری تەقەکردنەکە و کوشتنی ئەو ژنە دیار نییە. 

 

پۆلیسی ئاکرێ لەبارەی رووداوەکە رایگەیاند، رووداوەکە "لە گەڕەکی رۆناهی لە سەنتەری شاری ئاکرێ روویداوە. دەستبەجێ پۆلیس لە شوێنەکە ئامادە بوو. دەرکەوت ژنێک بە ناوی (ن. ح. ش.) تەمەن 40 ساڵ لەسەر کێشەیەکی کۆمەڵایەتی کوژراوە." 

 

دەشڵێت، تەرمی ژنەکە رەوانی دادپزیشکی دهۆک کراوە. هاوژینی کوژراوەکەش ناوی (ع. ئـ. ر.)ـە و تەمەنی 50 ساڵە. بە برینداری رەوانەی نەخۆشخانەی فریاکەوتن کراوە و چارەسەری پێویستی بۆ کراوە." 

 

پۆلیسی ئاکرێ ئاماژە بەوە دەکات، تۆمەتبارەکە رایکردووە و پەڕاوی لێکۆڵینەوەیان بۆ رووداوەک کردووەتەوە. تۆمەتبارەکە بە پێی مادەی 406ـی یاسای سزادانانی عێراق فەرمانی دەستگیکردنی بۆ دەرکراوە.