رووداو دیجیتاڵ
نرخی مریشک لە دابەزین بەردەوامە و ئەمڕۆ لە سلێمانی کیلۆی 2500 دینارە.
محەممەد عومەر، مریشکفرۆش لە سلێمانی ئەمڕۆ چوارشەممە بە رووداوی گوت، نرخی مریشک دابەزیوە و مریشکی گەورە کیلۆی 2500 دینارە.
لە هەولێریش نرخەکە دابەزیوە، بەڵام بەرزترە لە سلێمانی. بەشدار رەشۆ، فرۆشیاری مریشک لە گەڕەکی هەولێری نوێ ئەمڕۆ بە رووداوی گوت، کیلۆیەک مریشکی گەورە 2 هەزار و 600 دینارە.
سەرەتای ئەم مانگە کیلۆیەک مریشک 3 هەزار و 250 دینار بوو. لەکاتێکدا سەرەتای تەمموز کیلۆی 3 هەزار و 750 دینار بوو.
بەگوتەی مریشکفرۆشان، هۆکاری دابەزینی نرخ پێگەیشتنی مریشکە لە یەک کاتدا لە زۆرینەی کێڵگەکانی پەلەوەر.
بەگوێرەی وەزارەتی کشتوکاڵ و سەرچاوەکانی ئاوی هەرێمی کوردستان، ساڵانە زیاتر لە 105 ملیۆن مریشک لە هەرێمی کوردستان گەورە دەکرێن کە دەکاتە نزیکەی 250 هەزار تۆن گۆشت، لە کاتێکدا پێداویستیی ساڵانەی گۆشتی مریشک لە نێوخۆدا 146 هەزار تۆنە. ئەوەی لە پێداویستی نێوخۆ زیاترە هەناردەی پارێزگاکانی عێراق دەکرێت.
لە هەرێمی کوردستان خواستی زۆر لەسەر میشکی زیندووە بەراورد بە بەستوو. بۆ دابینکردنی مریشکیش هەزار و 840 پەلەوەرخانە هەن، بەڵام بەشێوەی هەمیشەیی هەموویان بەرهەمیان نییە.
ژمارەی پەلەوەرخانەکان بەپێی پارێزگاکان:
- هەولێر: 576 پەلەوەرخانە
- سلێمانی: 727 پەلەوەرخانە
- دهۆک: 344 پەلەوەرخانە
- هەڵەبجە: 35 پەلەوەرخانە
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ