رووداو دیجیتاڵ
19ـی ئەم مانگە هەردوو کۆمەڵەی زەحمەتکێشانی کوردستان و کۆمەڵەی شۆڕشگێڕی زەحمەتکێشانی کوردستانی ئێران یەکیان گرتەوە، لە راگەیێندراوی یەکگرتنەوەشیاندا کە رۆژی یەکشەممە 27-11 بڵاوکراوەتەوە دەڵێن، جیایی زیانی پێگەیاندوون و لەمەودوا لەژێر ناوی "کۆمەڵەی شۆڕشگێڕی زەحمەتکێشانی کوردستانی ئێران) دا کار و چالاکی دەکەن.
راگەیێندراوەکە لەلایەن کۆمیتەی هاوبەش بۆ یەکگرتنەوەی کۆمەڵە بڵاوکراوەتەوە و تێیدا هاتووە، یەکگرتنەوەکەیان دوای ساڵ و نیوێک لە "دیالۆگی هاوڕێیانە و چڕوپڕی نێوانمان لە ئاستی جۆراوجۆری حیزبیدا" بووە.
کۆمەڵەی شۆڕشگێڕی زەحمەتکێشانی کوردستانی ئێران دەڵێت، "هەموومان دەزانین کە جیایی زیانی پێگەیاندین و خەسارەکانی دەناسین. بە خۆشییەوە جیاوازیی سیاسی و روانگە، هۆکاری سەرەکیی دابڕانەکە نەبوو، دابڕان لە خەت و گوتاری سیاسیی کۆمەڵە قەت نەبووە بە کەلێن لەنێوانماندا و لەو بارەوە لێک دانەبڕاین."
کۆمەڵەی زەحمەتکێشانی کوردستان ساڵی 2007 لە کۆمەڵەی شۆڕشگێڕی زەحمەتکێشانی کوردستانی ئێران جیابووەوە و عومەر ئیلخانیزادە سکرتێری گشتیی حیزبەکە بوو. لە راگەیێندراوەکەیاندا ئەوەش هاتووە، ئێستا "یەکگرتووتر و بە گوڕ و تەوژمێکی نوێوە بۆ ئامانجە بەرزەکانی کۆمەڵە تێدەکۆشێت."
دوای یەکگرتنەوەکە، کۆمەڵەی شۆڕشگێڕی زەحمەتکێشانی کوردستانی ئێران دەڵێت، ئەوان خوازیاری پەوەندیی پتەون لەگەڵ "هەموو رەوتی دیموکرات و پێشکەوتنخواز و هەموو ئۆپۆزیسیۆنی سێکۆلاری ئێران. ئێمە هاوکات لەگەڵ بەرگری لە بەرژەوەندیی باڵا و داخوازیی بزووتنەوەی رزگاریخوازی کوردستان و پتەوکردنی یەکێتیی ئەوڕۆی حیزبە سیاسییەکان، پێمانوایە کوردستان دەتوانێ و بۆی هەیە دەوری کاریگەری هەبێ لە داڕشتنەوەی قەوارەی سیاسیی ئێرانی دوای کۆماری ئیسلامی."
کۆمەڵە باسی خۆپێشاندانەکانی ئێران و رۆژهەڵاتی کوردستانیشی کردووە کە دوای گیانلەدەستدانی ژینا ئەمینی کە بە گوتەی باوکی بۆ رووداو لەلای پۆلیسی رەوشت زەبر بەر سەری کەوتووە و کوژراوە، دەستیپێکردووە. دەڵێن، "ئاخێزی شۆڕشگێڕانەی ئێستا و شۆڕشی ژینا (مەهسا) دەریخست بزووتنەوەی کوردستان پێشەنگی یەکسانیی رەگەزی، دیموکراسی و دادپەروەریی کۆمەڵایەتی و سێکۆلاریزم و ئازادیی سیاسییە."
لە راگەیێندراوەکەدا ئەوەش هاتووە کە "کۆمەڵە خۆی بە بەختەوەر دەزانێ لە دەیان ساڵ خەباتی سەربەرزانەیدا بۆ پێکهاتنی ئەو بەستێنە کۆمەڵایەتی و پێشەنگایەتییەی ئەمڕۆی کوردستان، دەوری چالاکی هەبووە. بۆیە ئەو پێشەنگایەتی و ئەو رێبازە کە خۆی لە درووشمی ژن، ژیان، ئازادی دا دەبینێتەوە، وەک گلێنەی چاو دەپارێزین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ