رووداو دیجیتاڵ
وەزیری كشتوكاڵ و سەرچاوەكانی ئاوی هەرێمی كوردستان دەڵێت، "بۆ چارەسەركردنی کێشەی کەمیی وەرگرتنی گەنمی جووتیارانی هەرێمی كوردستان، پەیوەندیمان بە بەرپرسانی حكومەتی عێراقەوە كردووە و داوامان کردووە گەنمی زیاتر لە جووتیاران وەربگیرێت". گوتیشی، "بڕیارە داواكارییەكەمان بگاتە سەرۆكوەزیرانی عێراق".
بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان رۆژی شەممە، 27-5-2023، بە تۆڕی میدیایی رووداوی راگەیاند، پشكی وەرگرتنی گەنمی جووتیارانی هەرێمی كوردستان بۆ ئەمساڵ 375 هەزار تۆن دیاریكراوە کە زۆر كەمە و گوتیشی، "بۆیە پەیوەندیمان بە لایەنی پەیوەندار لە حكومەتی عێراق كردووە و داوای زیادكردنی ئەو پشكەمان كردووە، چونكە گەنمی ئەمساڵ زۆر لەو بڕە زیاترە كە دیاریكراوە لە جووتیارانی هەرێمی کوردستان وەربگیرێت".
وەزیری كشتوكاڵ و سەرچاوەكانی ئاوی هەرێمی كوردستان ئاماژەی بەوەش کرد کە بڕیارە داواكارییەكەیان بگاتە لای سەرۆکوەزیرانی عێراق و گوتی، "بڕیارە داواكارییەكەمان كە داواكاریی جووتیارانی هەرێمی كوردستانە، بەم نزیكانە بگاتە لای محەممەد شیاع سوودانی، سەرۆکوەزیرانی عێراق و چاوەڕێی وەڵامێكی ئەرێنێ دەكەین".
بڕیار بوو رۆژی پێنجشەممە، 25-5-2023، وەرگرتنی گەنم لە هەرێمی کوردستان دەستی پێ بکردایە، بەڵام دواتر وەزارەتی بازرگانیی هەرێمی کوردستان رایگەیاند، بەهۆی کێشەی تەکنیکی و نەگەیشتنی "سیدی" ناو و زانیاری لەبارەی جووتیارانەوە بە وەزارەتی بازرگانیی عێراق، بڕیار دراوە رۆژی شەممە لە سایلۆکانی هەرێمی کوردستان وەرگرتنی گەنم دەستپێبکات. لەو چوارچێوەیەدا ئەمڕۆ شەممە وەرگرتنی گەنم دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ