دیدارێک بۆ پرسی ناوچە کوردستانییەکانی دەرەوەی ئیدارەی هەرێمی کوردستان لە گوڵەخانە بەڕێوەدەچێت

 

 

سەرۆکی پارتەکە دەڵێت، زۆربەی ئەوانەی لە دیدارەکەدا پانێڵیان دەبێت، خەڵکی کەرکووک و ناوچە کوردستانییەکانی دیکەی دەرەوەی هەرێمی کوردستانن.

 

ئەمڕۆ شەممە، 24-08-202، لە هۆڵی ئاشتیی گوڵەخانەی سنووری پارێزگای هەڵەبجە دیدارێک بەڕێوەدەچێت کە ئامانج لێی خستنەڕووی پرسی کوردە لە ناوچە کوردستانییەکانی دەرەوەی ئیدارەی هەرێمی کوردستان و دەستنیشانکردنی گرفتەکان.

 

 

بڕیارە لە دیدارەکەدا ژمارەیەک پانێڵ بەڕێوەبچن. د. فەرهاد تۆفیق، گوتەبێژی پارتی سۆسیال دیموکراتی کوردستان لەو بارەیەوە قسەی بۆ سازگار سەڵاح، پەیامنێری تۆڕی میدیایی رووداو کرد و گوتی، ''پانێڵەکان دابەش دەبن بەسەر پانێڵی یاسایی، سیاسی، کارگێڕی و بابەتی پێکەوەژیان لە ناوچە کوردستانییەکانی دەرەوەی ئیدارەی هەرێمی کوردستان.''

 

هاوکات محەممەدی حاجی مەحموود، سەرۆکی پارتی سۆسیال دیموکراتی کوردستان لە پەراوێزی دیدارەکەدا بە رووداوی راگەیاند، "کۆمەڵێک میوانی گرنگ، کەسایەتی سیاسی و حیزبی بانگهێشتی دیدارەکە کراون و زۆربەی ئەوانەی پانێڵەکان بەڕێوەدەبەن، خەڵکی کەرکووک و ناوچە کوردستانییەکانی دیکەی دەرەوەی ئیدارەی هەرێمی کوردستان".

 

بەگوتەی محەممەدی حاجی مەحموود، ئامانج لە دیدارەکە خستنەڕووی پرسی کوردە لە ناوچە کوردستانییەکانی دەرەوەی ئیدارەی هەرێمی کوردستان و ''لە نێو دیدارەکەشدا لیژنەیەکی تایبەتمەند پێکدەهێنرێت بۆ ئەوەی راسپارەدەکان بنووسرێنەوە و بەدواداچووونیان بۆ بکرێت بۆ جێبەجێکردنیان.''

 

گوتەبێژی پارتی سۆسیال دیموکراتی کوردستانیش گوتی، دوای دەستنیشانکردنی کێشەکان و دۆزینەوەی چارەسەر، لە رێگەی لیژنەکەوە راسپاردەکانی دیدارەکە بەپێی پێویست ئاراستەی لایەنە پەیوەندیدارەکان لە پەرلەمانی عێراق، حکومەتی خۆجێیی ناوچەکان، حکومەتی هەرێمی کوردستان و لایەنە سیاسییەکان دەکرێت.