ئەندامێکی ئەنجوومەنی کەرکووک: کار بۆ گۆڕینی دابەشکردنی دامەزراندنی گرێبەستەکان دەکەین

 

 

ئەحمەد کەرکووکی، ئەندامی ئەنجوومەنی پارێزگای کەرکووک ئەمڕۆ شەممە بە تۆڕی میدیایی رووداوی راگەیاند: "دوای پەسندکردنی بودجەی عێراق بڕیاردرا بە دامەزراندنی 150 هەزار کەس بە شێوەی گرێبەست لە سەرتاسەری عێراق، لەو ژمارەیەش 7 هەزار و 304ـی بەر کەرکووک دەکەوێت."

 

ئەحمەد کەرکووکی گوتیشی: "ئەمڕۆ شەممە لە کۆبوونەوەی ئەنجوومەندا یەکەم خوێندنەوە بۆ ئەو بابەتە دەکەین و گفتوگۆ لەبارەی شێوازی دامەزراندنەکە و پشکی قەزا و ناحییەکان دەکەین". 

 

ئەو ئەندامەی ئەنجوومەنی پارێزگای کەرکووک گوتیشی: "لەو شێوازە دابەشکارییەی پشکی قەزا و ناحییەکانی تێدا دیاریکراوە جۆرێک لە ستەمی بەرامبەر کورد تێدایە؛ بۆیە هەوڵ دەدەین ئەو شێوازە بگۆڕین و دادپەروەری لە دابەشکردنەکەدا بێنینە کایەوە."

 

شێوازی دابەشکاری لە قەزا و ناحییەکانی کەرکووک لە پشکی دیاریکراوی پارێزگاکە کە 7 هەزار و 304 کەسە، لە ساڵی رابردوودا بەمجۆرە دیاریکراوە:

 

شاری کەرکوک: 4.456

حەویجە: 552 

داقووق: 304

ریاز: 277

زاب: 263

ئەلعەباسی: 249

دوبز 230

پردێ : 193

تازە: 158

رەشاد: 131

یایجی: 127

سەرگەڕان: 94

لەیلان: 88

مولتەقا: 73

قەرە هەنجیر: 56

شوان: 53 

 

بەگوێرەی مادەی 13 لە یاسای بودجەی گشتیی ساڵی 2023، حکومەتی عیراق بڕیاریدا بە دامەزراندنی 150 هەزار کەس بەشێوەی گرێبەست و لە 15ـی ئاداری ئەم ساڵ بەستەری ئەلیکترۆنیی خۆتۆمارکردن کارا کرا.

 

لە 1ـی شوباتی ئەم ساڵ، گوتەبێژی ئەنجوومەنی راژەی عێراق بە رووداوی گوت، "150 هەزار کەس بۆ پارێزگاکان، 37 هەزار کەس بۆ وەزارەتی ناوخۆ، 50 هەزار کەس بۆ وەزارەتی پەروەردە، 10 هەزار کەس بۆ وەزارەتی بەرگریی عێراق بە شێوەی گرێبەست دادەمەزرێندرێن."