رووداو دیجیتاڵ
بەڕێوەبەری پۆلیسی پارێزگای لوڕستان دەڵێت، لە 24 کاژێردا دەستیان بەسەر زیاتر لە 54 کیلۆگرام مادەی هۆشبەردا گرتووە. گوتیشی، هەر لەو ماوەیەدا دەست بەسەر 54 چەکی جۆراوجۆر و 577 گولـلەدا گیراوە.
دوانیوەڕۆی یەکشەممە 23-02-2025 یەحیا ئیلاهی، بەڕێوەبەری پۆلیسی پارێزگای لوڕستانی رۆژهەڵاتی کوردستان رایگەیاند، لە چوارچێوەی ئۆپەراسیۆنێکدا بۆ بەرەنگاربوونەوە و نەهێشتنی تاوان، لە سنووری پارێزگاکە دەستیان بەسەر 49 چەکی راوکردن، پێنج چەکی شەڕ و 577 گولـلەدا گرتووە، 34 کەسیش دەستگیر کراون.
یەحیا ئیلاهی گوتی، هەر لەو ماوەیەدا لەلایەن تیمەکانیانەوە دەست بەسەر 54 کیلۆ و 683 گرام مادەی هۆشبەری جۆراوجۆردا گیراوە.
بە گوتەی بەڕێوەبەری پۆلیسی پارێزگای لوڕستان، پەیوەست بە دۆسیەکە پێنج بازرگانی مادەی هۆشبەر، 31 فرۆشیار دەستگیر کراون و 44 ئالوودەبووی مادەکەش نێردراونەتە ناوەندەکانی چاکسازی.
هەر لەو چوارچێوەیەدا، وەکو یەحیا ئیلاهی دەڵێت، دەستیان بەسەر 142 ئۆتۆمبێلی تایبەت و 20 ماتۆڕسکیلیشدا گرتووە.
پارێزگای لوڕستان بەهۆی هاوسنووربوونی لەگەڵ پێنج پارێزگای خوزستان، چوارمەحاڵ و بەختیاری، مەرکەزی، هەمەدان و ئیسفەهانی ئێران، هەروەها دوو پارێزگای کرماشان و ئیلامی رۆژهەڵاتی کوردستان، وەکو ترانزێت بۆ گواستنەوەی مادەی هۆشبەر چی بۆ دەرەوە و چی بۆ نێوخۆی ئێران و رۆژهەڵاتی کوردستان بەکاردەهێندرێت.
بەگوێرەی راپۆرتێکی پۆلیسی نەهیشتنی مادە هۆشبەرەکانی لوڕستان، لە سەرەتای نەورۆزەوە تاوەکو 19-10-2024، لە سنووری پارێزگاکە دەست بەسەر لانیکەم 12.5 تۆن مادەی هۆشبەری جۆراوجۆردا گیراوە و 24 باندی فرۆشتنی مادەکەش هەڵوەشێندراونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ