هەڵەیەک روویدا! دووبارە هەوڵبدە
رووداو دیجیتاڵ
گرووپە چەکدارەکانی شیعە، کە خۆیان بە "مقاوەمەی ئیسلامی لە عێراق" دەناسێنن بانگەشەی ئەوە دەکەن هێرشیان کردووەتە سەر هێزەکانی هاوپەیمانان لە فڕۆکەخانەی هەولێر، سەرچاوە ئەمنی و مەدەنییەکانی فڕۆکەخانەی نێودەوڵەتیی هەولێریش کە بۆ رووداو قسەیانکرد، زانیاریی جیاواز دەدرکێنن.
سەرچاوەیەکی ئەمنیی لە فڕۆکەخانەی نێودەوڵەتیی هەولێر بە تۆڕی میدیایی رووداوی راگەیاند، شەوی رابردوو هیچ هێرشێک لە نێو فڕۆکەخانەکە و دەرەوەی فڕۆکەخانەکە رووینەداوە.
سەبارەت بەو دەنگۆیانەشی کە باس لەوە دەکەن، کە شەوی رابردوو بەهۆی هێرشی گرووپە چەکدارەکانەوە چەند گەشتێکی فڕۆکەخانەکە راگیراون، سەرچاوەیەکی دیکەی مەدەنی لە فڕۆکەخانەکە بە رووداوی گوت: "هیچ گەشتێکی فڕۆکەخانە رانەگیراوە و هەموو شتێک ئاساییە."
ئەمە لە کاتێکدایە گرووپە چەکدارەکانی شیعە، کە خۆیان بە "مقاوەمەی ئیسلامی لە عێراق" دەناسێنن، رۆژی پێنجشەممە 23-11-2023 لە راگەیێندراوێکدا بڵاویکردەوە، "لە تۆڵەی غەززە و کردنە ئامانجی هێزەکانیان، بنکەی سەربازیی ئەمریکایان لە فڕۆکەخانەی هەولێر، بە فڕۆکەی بێفڕۆکەوان کردووەتە ئامانج و راستەوخۆش ئامانجەکەیان پێکاوە."
سەرچاوەیەکی دیکەی مەدەنی لە فڕۆکەخانەی نێودەوڵەتیی هەولێر گوتی: "بەڵێ بەرەبەیانی ئەمڕۆ هێرشکراوەەتە سەر هێزەکانی ئەمریکا لە فڕۆکەخانە، بەڵام بە سیستەمی دژە مووشەکی سیڕام وەڵامدراوەتەوە."
تاوەکو ئێستا دامەزراوە فەرمییەکانی هەرێمی کوردستان و فڕۆکەخانەی هەولێریش هیچ لێدوانێکیان لەبارەی ئەو رووداوە نەداوە.
لەدوای شەڕی ئیسرائیل و حەماس لە سەرەتاکانی مانگی ئۆکتۆبەرەوە، گرووپە چەکدارەکان لە عێراق و سووریا هێزەکانی هاوپەیمانان بە سەرۆکایەتیی ئەمریکا دەکەنە ئامانج. ئەمریکا دەڵێت، گرووپە چەکدارەکان سەر بە ئێرانن و چەندین جار لە عێراق و سووریا هێرشی کردوونەتەسەر.
بەرەبەیانی رۆژی چوارشەممە، 22-11-2023، فەرماندەیی ناوەندیی سوپای ئەمریکا - سێنتکۆم رایگەیاند: "بەرەبەیانی ئەمڕۆ لە وەڵامی راستەوخۆی هێرشی ئێران و گرووپەکانی سەر بە ئێران بۆ سەر هێزەکانمان و هێزەکانی هاوپەیمانان، هێرشمان کردە سەر دوو بنکەی ئەو گرووپانە لە عێراق."
بە گوێرەی راگەیێندراوێکی حەشدی شەعبی، لە ئەنجامی هێرشەکەی ئەمریکا بۆ سەر هێزەکانیان لە ناوچەی جورف سەخەر، 8 چەکداری حەشد کوژراون و چواریشیان بریندار بوونە.
بەگوێرەی وەزارەتی بەرگریی ئەمریکا - پێنتاگۆن، لە 17ـی تشرینی یەکەمەوە زیاتر لە 60 جار هێرش کراوەتە سەر هێزەکانی ئەمریکا و هاوپەیمانیی نێودەوڵەتی لە عێراق و سووریا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ