رووداو دیجیتاڵ
بەڕێوەبەری گشتیی بەنداو و کۆگاکانی ئاوی هەرێمی کوردستان دەڵێت، بەراورد بە هەمان رێکەوتی ساڵی رابردوو، ئەم ساڵ ئاوی کۆگاکراو لە هەرێمی کوردستان کەمیکردووە.
رەحمان خانی، بەڕێوەبەری گشتیی بەنداو و کۆگاکانی ئاو لە هەرێمی کوردستان، ئەمڕۆ یەکشەممە بە تۆڕی میدیایی رووداوی گوت: "ئێستا ئاوی کۆگاکراو لە هەرێمی کوردستان سێ ملیار و 700 ملیۆن مەتر سێجایە".
بەشی زۆری ئاوی کۆگاکراوی هەرێمی کوردستان لە بەنداوەکانی دووکان، دەربەندیخان و دهۆکدایە، کە تەنیا ئەو سێ بەنداوە توانای گلدانەوەی 10 ملیار مەتر سێجا ئاویان هەیە.
لەبارەی هۆکاری کەمبوونەوەی ئاو، بەڕێوەبەری گشتیی بەنداو و کۆگاکانی ئاو گوتی: "ئەم ساڵ بەشێوەیەکی گشتی باران کەمبوو، ئەوەش کاریگەری لەسەر داهاتی ئاوی بەنداوەکان هەبووە و کۆگاکردن کەمتر بووە لە پار".
رەحمان خانی ئاماژەی بەوەشکرد، لە هەرێمی کوردستان وەرزی بارانبارین تاوەکو مانگی ئایار بەردەوام دەبێت و کۆگاکردنی ئاویش تاوەکو کۆتایی مانگەکە بەردەوام دەبێت.
ئەم وەرزەی باران بەراورد بە وەرزی بارینی رابردوو، لە زۆرینەی ناوچەکانی هەرێمی کوردستان بارانی کەمتر باریوە، بەتایبەت لە هەولێر و دهۆک، کە ئاستی بارانی نەگەیشتووە بە نیوەی وەرزی پێشتر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ