پۆلیسی سلێمانی گەنجێکی دەستگیرکرد کە "تەقەی لە یانەی شەوانە کردووە"

رووداو - سلێمانی 

پۆلیسی سلێمانی گەنجێکی دەستگیرکرد و دەڵێت، تۆمەتبارە بەوەی تەقەی لە سێ یانەی شەوانە کردووە.

بەشی راگەیاندن و پەیوەندییەكانی بەڕێوەبەرایەتی پۆلیسی پارێزگای سلێمانی لە راگەیێندراوێکدا ئاشکرای کرد "شەوی 21ـی ئەم مانگە لە ناوسنووری گەڕەكی سەرچنار كەسێكی پشێویی و ئاژاوەی دروستکردووە و تەقەی لە سێ‌ یانەی شەوانە کردووە".

پۆلیس دەڵێت، دەستبەجێ‌ هێزەكانی بنكەی پۆلیسی سەرچنار گەیشتوونەتە شوێنی رووداوەكە و  هێڵكاری بۆ شوێنەكە كراوە، پاش وەرگرتنی فەرمانی دادوەر و وەرگرتنی كامێراكانی چاودێری و ناسینەوەی وێنەی تۆمەتبارەکە، توانرا لە ماوەی كەمتر لە 24 كاژێر دەستگیربكرێت.

پۆلیسی سلێمانی ئاماژەی بەوەکردووە، توانراوە دەستبگیرێت بەسەر دەمانچەیەكدا كە بە تۆمەتبارەکە بووە.

بەپێی زانیاری پۆلیس، تۆمەتبارەکە دانیشتووی شاری سلێمانی و لەدایكبووی 1987ـە بەپێی مادەی 430 لە یاسای سزادانی عیراقی راگیراوە.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger