رووداو دیجیتاڵ
ئەنجوومەنی وەزیرانی هەرێمی کوردستان ئەمڕۆ چەند پێشنیار و راسپاردەیەکی ئەنجوومەنی گشتیی راژەی پەسند کرد. سیراج بارزانی دەڵێ خشتەی مووچەخۆران کە دوای وردبینی پێشکێشی حکومەتی فیدراڵی و هەرێمی کوردستان کرا "هەنگاوێکی گرنگە بە ئاراستەی دابینکردنی شایستەی دارایی مووچەخۆران."
بە سەرپەرشتیی مەسرور بارزانی، سەرۆکوەزیران و ئامادەبوونی قوباد تاڵەبانی، جێگری سەرۆکوەزیران، ئەمڕۆ (چوارشەممە، 22-11-2023) ئەنجوومەنی وەزیرانی هەرێمی کوردستان کۆبووەوە
حکومەتی هەرێمی کوردستان لەبارەی ناوەڕۆکی کۆبوونەوەکە رایگەیاند، سیراج بارزانی، سەرۆکی ئەنجوومەنی گشتیی راژەی، راپۆرتێکی سەبارەت بە میلاکی گشتی و هێزی کاری کەرتی گشتیى حکومەتی هەرێمی کوردستان، بە ژمارە، داتا و زانیاریى ورد لەسەر ئەم بابەتە و پێشنیار و چارەسەری پێویست خستەڕوو، بەمەبەستی بە دامەزراوەییکردنی پرۆسەی دامەزراندن لە کەرتی گشتی، بە رەچاوکردنی پەیکەری کارگێڕی و بەڕێوەبردنی پێکهاتەی وەزارەت و دامەزراوەکانی هەرێم.
لەنێو راپۆرتەکەدا بەپێی راگەیێندراوەکەی حکومەت، سەرۆکی ئەنجوومەنی گشتیی راژە، ئەنجامی پرۆسەی وردبینیی هاوبەشی هەردوو دیوانی چاودێریى دارایی فیدراڵ و هەرێمی کوردستانی خستەڕوو سەبارەت بە میلاکی گشتی و ئاماژەی بەوە دا؛ سەرجەم خشتە و زانیاری و ژمارەکان خراونەتە بەردەم تیمی هاوبەشی وردبینی و لە ئەنجامدا دوای وردبینی، خشتەی مووچەخۆرانی هەرێم پێشکەش بە هەردوو حکومەتی فیدراڵیی و هەرێم کرا، "کە هەنگاوێکی گرنگە بە ئاراستەی دابینکردنی شایستەی دارایی مووچەخۆران."
دوای گفتوگۆ و تاوتوێکردنی راپۆرتەکە، ئەنجوومەنی وەزیران چەند پێشنیار و راسپاردەیەکی ئەنجوومەنی گشتیی راژەی گشتیی پەسند کرد ''لەپێناو بەدامەزراوەییکردنی زیاتری کەرتی وەزیفەی گشتی و هێزی کار لە دامەزراوەکانی هەرێم، هەروەها سەرجەم وەزارەتەکانیش راسپێردران هاوکاری ئەنجوومەنی گشتیی راژە بکەن بۆ جێبەجێکردنی ئەو بڕیارانەی پەسندکران، فەرمانگەی هەماهەنگی و بەدواداچووونیش راسپێردرا بۆ رەخساندنی هەماهەنگی بۆ ئەم مەبەستە.
ژمارەى فەرمانبەرانى هەرێمى کوردستان لە یاسای بودجەى گشتیی عێراق 689 هەزار کەسە، لەکاتێکدا ژمارەى فەرمانبەرانى هەرێمى کوردستان دوو ئەوەندەى ئەو ژمارەیەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ