لەیلا زانا، سیاسەتڤانی کورد لە ئاهەنگی نەورۆزی ئامەد.
رووداو دیجیتاڵ
سیاسەتڤانی کورد لەیلا زانا لە ئامەد دەڵێت، کورد ئاهەنگی نەورۆزی بە نێودەوڵەتی کردووە، باسیشی لە رۆڵی سەرکردایەتیی رێبەرانی کورد کرد و گوتی، "ئێمە بە تێکۆشانی مەلا مستەفا بارزانی هەستمان بە کوردایەتی کرد".
ئەمڕۆ پێنجشەممە لە ئاهەنگی نەورۆزی ئامەد، لەیلا زانا، کەسایەتیی سیاسیی کورد و پەرلەمانتاری پێشووی پەرلەمانی تورکیا گوتارێکی پێشکێشکرد و وێڕای پیرۆزبایی جەژنی نەورۆز رایگەیاند، ''ئامەد سیاسەت، فەلسەفە و گەرمایی دڵی مێزۆپۆتامیایە''.
لەیلا زانا داوای لە هاونیشتمانیان کرد بە ئارامییەوە ئاهەنگی نەورۆز بەڕێوەببەن، بەڵام بە جۆش و خرۆشەوە تێیدا بەشدار بن.
ئەو سیاستڤانە کوردە جەژنی نەورۆزی لە هاونیشتمانییانی هەر چوار پارچەی کوردستان پیرۆز کرد و پەیامێکی ئاراستەی کوردانی رۆژهەڵاتی کوردستان کرد و گوتی، ''رۆژئاوا، باشوور، باکوور و برینی دڵی من رۆژهەڵاتی کوردستان، من بۆ هاونیشتمانییانی رۆژهەڵات خەمبارم؛ نەورۆز لە هەمووتان پیرۆز بێت".
لەیلا زانا لە میانی گوتارەکەیدا باسی لە رۆڵی کەسایەتی و رێبەرانی کورد لە پاراستنی هەستی کوردایەتی لە هەر چوار پارچەی کوردستان کرد و گوتی، ''ئێمە بە تێکۆشانی مەلا مستەفای بارزانی هەستمان بە هەستی کوردایەتی کرد".
هاوکات ئەو سیاسەتڤانە کوردە باسی لە عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) کرد و رایگەیاند، ''ئێمە بە زانایی، فەلسەفە و خەباتی سەرۆک ئاپۆ هۆشیار بووینەوە".
بەگوتەی یونسکۆ زیاتر لە 300 ملیۆن کەس لە جیهان یادی نەورۆز دەکەنەوە، لەیلا زانا لەوبارەوە دەڵێت، ''ئەو گەلانەی کە ژێردەستن یادی نەورۆز دەکەنەوە، بەڵام هیچ یەک لە نەتەوەکان وەکو کورد بەڕێوەی نابەن، کورد جەژنی نەورۆزی بە نێودەوڵەتی کردووە".
نەورۆزی ئەم ساڵ هاوکاتە لەگەڵ نزیکبوونەوەی هەڵبژاردنی شارەوانییەکانی باکووری کوردستان و تورکیا، کە بڕیارە لە 31ـی ئەم مانگە بەڕێوەبچێت، ئەمەش ئاهەنگەکانی نەورۆزی زیاتر بە جۆش و خرۆش کردووە.
ئەو سیاسەتڤانە کوردە ئاماژەی بەوە کرد، ''ئێوە دەزانن هەڵبژاردن نزیکە، ئێمە ئیرادەی خۆمان تەنیا بۆ خۆمان بەکاردەهێنین و دەنگ بە بەربژێری پارتە کوردییەکان دەدەین".
بە تێپەڕبوونی کات، رکابەریی لەنێوان حیزبە سیاسییەکان بۆ هەڵبژاردنی شارەوانییەکان گەرموگوڕتر و بەهێزتر دەبێت، بەڵام لە ئامەد رکابەرییەکە لەنێوان دەم پارتی و ئاکپارتی دایە و ئێستا لەلایەن قەیوومەکانەوە بەڕێوەدەچێت.
لەیلا زانا کێیە؟
ساڵی 1961 لە شارۆچکەی فارقین لە ئامەد لەدایکبووە.
لە تەمەنی 21 ساڵیدا ژیانی هاوژینی لەگەڵ مەهدی زانا سەرۆکی گەورەشارەوانی پێشووتری ئامەد پێکهێنا.
ساڵی1987 یەکێک بوو لە دامەزرێنەرانی کۆمەڵەی مافەکانی مرۆڤ کە ناوەندەکەی لە ئامەدە.
ساڵی 1988 رۆژنامەی یەنی ئولکەی دامەزراند و خۆی سەرنووسەری بوو.
ساڵی 1991 لەسەر لیستی پارتی سۆسیال دیموکراسی گەلان SHP لە بازنەی ئامەد بووە پەرلەمانتار.
لە رێوڕەسمی سوێندخواردنیدا بەهۆی بەستنی ملپێچی رەنگ زەرد و سوور و سەوز و بە کوردی سڵاوکردن، رەخنەی تووندی لێگیرا.
ساڵی 1994 بەهۆی گوتارێکی لە ئەمریکا، پارێزبەندی لە خۆی، ئەحمەد تورک، ئۆرهان دۆغان، خەتیب دیجلە، سری ساکیک و مەحموود ئاڵنیئاک سەندرایەوە.
هەمان ساڵ بەتۆمەتی ئەندامێتی و بانگەشەکردن بۆ پەکەکە، سزای 15 ساڵ زیندانیکردنی بەسەردا سەپێندرا.
نامەکانی لەیلا زانا لەناو زیندان کراونەتە کتێب.
بەهۆی گوشارەکانی دادگەی باڵای مافەکانی مرۆڤی یەکێتیی ئەوروپا، لەیلا زانا رۆژی 8ـی حوزەیرانی 2004 دوای 10 ساڵ زیندانیکردن ئازادکرا.
سێ خولی دیکە لە بازنەی ئاگری بووە پەرلەمانتار و دوایینجار بەهۆی ئەوەی وەکو دەقی نووسراو، سوێندی یاسایی نەخوارد، لە پەرلەمانتاری لادرا.
دایکی دوو منداڵە و ئێستا هیچ پۆستێکی حکومی و حیزبی نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ