رووداو دیجیتاڵ
گوتەبێژی وەزارەتی دەرەوەی ئەمریکا لەبارەی سەرژمێریی گشتی لە عێراق بە رووداوی گوت، پێشوازی لێدەکەن و هاووڵاتییانی عێراق و هاونیشتمانییانی هەرێمی کوردستان هان دەدەن بەشداری تێدا بکەن.
رۆژی سێشەممە، 19ـی تشرینی دووەمی 2024، ماتیۆ میلەر، گوتەبێژی وەزارەتی دەرەوەی ئەمریکا لە کۆنفرانسێکی رۆژنامەڤانیدا بە دیار کوردە، بەرپرسی نووسینگەی رووداوی لە واشنتن راگەیاند، "ئێمە پێشوازی لە یەکەم سەرژمێری دەکەین کە لە ساڵی 1997ـەوە دەکرێت و هەموو پارێزگاکانی عێراق دەگرێتەوە."
گوتەبێژەکەی وەزارەتی دەرەوەی ئەمریکا داوای لە هاووڵاتییانی عێراق و هاونیشتیمانییانی هەرێمی کوردستان کرد کە بەشداری لە سەرژمێرییەکەدا بکەن و گوتی، ئەو سەرژمێریە بۆ بەدەستخستی زانیاریی ورد بۆ داڕشتنەوەی ستراتیژی سیاسی، ئابووری و گەشەپێدانی عێراق گرنگە.
میلەر داوا لە هەموو عێراقییەکان، لەنێویاندا هاونیشتمانییانی هەرێمی کوردستان دەکات بەشداری لەو سەرژمێرییەدا بکەن.
ماتیۆ میلەر لەبارەی ئەو هێرشانەشی کە لەنێو عێراقەوە دەکرێنە سەر ئیسرائیل گوتی، "دەبێت عێراق هەموو شتێک کە لە توانایدا بێت بیکات بۆ ئەوەی هێرشە تیرۆریستییەکان بووەستێنێت".
دەقی پرسیار و وەڵامی رووداو لەگەڵ گوتەبێژی وەزارەتی دەرەوەی ئەمریکا:
رووداو: زۆر سوپاس مات. دوێنێ، وەزیری دەرەوەی ئیسرائیل نامەیەکی بۆ سەرۆکی ئەنجوومەنی ئاسایشی نەتەوەیەکگرتووەکان نارد و داوای لە نەتەوەیەکگرتووەکان کردووە گوشار لە عێراق بکات و هەنگاوی دەستبەجێ بگرێتەبەر بەرامبەر گرووپە پشتیوانلێکراوەکان لەلایەن ئێرانەوە کە هێرش دەکەنە سەر ئیسرائیل. ئایا ئیسرائیل لە چەند مانگی رابردوودا هیچ نامەیەک یان پەیامێکی لە رێگەی ئێوەوە بۆ عێراق ناردووە؟
ماتیۆ میلەر، گوتەبێژی وەزارەتی دەرەوەی ئەمریکا: من قسە لەسەر گفتوگۆ تایبەتە دیپلۆماسییەکان ناکەم. هەروەک دەزانی، دوێنی لەبارەی ئەو پرسە پرسیارت لێم کرد و منیش لەوبارەوە قسەم کرد. هەڵوێستی ئێمە هەر ئەوەیە کە دەبێت عێراق هەموو شتێک کە لە توانایدا بێت بیکات بۆ ئەوەی هێرشە تیرۆریستییەکان بووەستێنێت؛ دەبێت هێرشە تیرۆریستییەکانی نێو سنوورەکانی و دەرەوەی سنوورەکانیش بووەستێنێت. وەک رێزگرتنێکیش لە گفتوگۆ تایبەتە دیپلۆماسییەکان، قسە لەسەر ئەو گفتوگۆیانە ناکەم".
رووداو: ئەوەی وەزیری دەرەوەی ئیسرائیل لە نامەیەکیدا باسیکردووە دەڵێت: جەختم لەوەکردەوە کە حکومەتی عێراق بەرپرسە لە هەموو ئەو شتانەی لەنێو خاکی عێراق روودەدەن. ئێوە لەگەڵ وەزیری دەرەوەی ئیسرائیل هاوڕان کە حکومەتی عێراق بەرپرسە لە کرداری گرووپە چەکدارەکان کە خاکی عێراق بەکاردەهێنن بۆ هێرشکردنە سەر ئیسرائیل؟
ماتیۆ میلەر، گوتەبێژی وەزارەتی دەرەوەی ئەمریکا: بەدڵنیاییەوە ئێمە دەمانەوێت ببینین کە حکومەتی عێراق هەموو ئەوەی لەتوانایدایە دەیکات بۆ ئەوەی ئەو جۆرە هێرشە تیرۆریستیانە بووەستێنێت.
رووداو: دوایین پرسیار. بڕیارە عێراق سەرژمێری سەرتاسەری لەم هەفتەیەدا بکات، ئەوەش هەندێک نیگەرانی لەلایەن کورد و پێکهاتەکانی دیکە لە نێویاندا کریستیانەکان دروستکردووە کە رەنگە ببێتە هۆکاری گۆڕانی دیمۆگرافیا، بەتایبەتی لە ناوچە جێناکۆکەکان. ژمارەیەکی زۆر کورد و پێکهاتەکانی دیکە لە نێویاندا ئێزدی و کریستیان لە چەند ساڵی رابردوودا بە ناچاری ئەو شوێنانەیان جێهێشتووە. حکومەتی ئەمریکا ئەم پرۆسەیە و هەروەها نیگەرانییەکان سەبارەت بە گۆڕانی ناسرووشتی دیمۆگرافیا چۆن دەبینێت؟
ماتیۆ میلەر، گوتەبێژی وەزارەتی دەرەوەی ئەمریکا: ئێمە پێشوازی لە یەکەم سەرژمێری دەکەین کە لە ساڵی 1997ـەوە بۆ یەکەمجارە ئەنجام دەدرێت و هەموو پارێزگاکانی عێراق دەگرێتەوە. ئەو سەرژمێریە بەهەمان شێوەی ئەمریکا کە سەرژمێرییەکانی ئەنجام دەدات، بۆ بەدەستخستی زانیاریی ورد بۆ داڕشتنەوەی ستراتیژی سیاسی، ئابووری و گەشەپێدانی عێراق گرنگە. داوا لە هەموو عێراقییەکان، لەنێویاندا هاووڵاتیانی هەرێمی کوردستانی عێراق دەکەین بەشداری لەو سەرژمێرییەدا بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ