ڤیدیۆکە، کە لە تۆڕە کۆمەڵایەتییەکان دەنگۆی زۆری ناوەتەوە
رووداو دیجیتاڵ
ژمارەیەک خوێندکاری بەشە ناوخۆیی شەهید شەوکەت لە هەولێر، لە نهۆمی سەرەوە پاشماوە فڕێدەدەنە خوارەوە، زانکۆی سەلاحەدینیش هەڕەشەی سزادانیان دەکات، ئەگەر نەگەڕێنەوە و پاشماوەکان پاکنەکەنەوە.
ژمارەیەک خوێندکاری بەشە ناوخۆییەکە کە خۆیان دیمەنەکەیان تۆمار کردووە، لە پەنجەرەی ژوورەکەیانەوە، پەرداخی شووشە، کەرەستەی شووشە کە جێگەی هەڵگرتنی خواردنە، دەبەی پلاستیک و مەنجەڵی فافۆن هەڵدەدەنە خوارەوە.
سامان عەبدوڵڵا، بەڕێوەبەری راگەیاندنی زانکۆی سەلاحەدین ئەمڕۆ (شەممە، 18-5-2024) بە تۆڕی میدیایی رووداوی گوت "ئەو خوێندکارانەی ئەو کارەیان کردووە دەستنیشان کراون، بەڵام ئاشکرایان ناکەین، بۆ ئەوەی خۆیان بگەڕێنەوە و خاوێنی بکەنەوە، ئەگەر وانەکەن بە دڵنیاییەوە بڕوانامەی دەرچوونیان پێنادرێت."
بەگوتەی سامان عەبدوڵڵا، خوێندکارەکان دوای تاقیکردنەوەکانیان ئەو کەرەستە و شتومەکانەیان هەڵداوەتە خوارەوە. گوتیشی "دەبێت شوێنەکە خاوێن بکەنەوە، دواتریش بەشی یاسایی زانکۆ چ بڕیارێک دژیان دەدات، ئەوە ئەوان دەزانن."
زانکۆی سەلاحەدین نزیکەی 27 هەزار خوێندکار و دوو هەزار و 600 مامۆستا و پێنج هەزار فەرمانبەری هەیە. زانکۆکە پێکهاتووە لە 16 کۆلێژ و 85 بەشی ئەکادیمی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ