رووداو دیجیتاڵ
لە سلێمانی نرخی بەنزینی نۆرماڵ بەرزبووەوە، بەڵام لە هەولێر جێگیرە.
بەهمەن شێخ قادر، گوتەبێژی بەنزینخانەکانی سلێمانی ئەمڕۆ شەممە بە تۆڕی میدیایی رووداوی گوت، نرخی لیترێک بەنزینی نۆرماڵ لە 850 دینارەوە بووە بە 875 دینار.
سەرەتای مانگی چواری ئەم ساڵ لیترێک بەنزینی نۆرماڵ لە سلێمانی 775 دینار بوو.
لەبارەی هۆکاری بەرزبوونەوەی نرخەکە بەهمەن شێخ قادر گوتی، "بەنزین لە ئێران و عێراقەوە کەمتر هاوردە دەکرێت و لەنێوخۆشدا خواستی زۆر لەسەرە. بەنزینی حکومیی 750 دیناریش بۆ سلێمانی نایەت. ئەوانە هەموویان هۆکارن."
لە هەولێر زیاتر لە دوو مانگە نرخ جێگیرە. سەرباز کەریم، گوتەبێژی گازفرۆشانی هەولێر ئەمڕۆ شەممە بە رووداوی گوت، "بەنزینی نۆرماڵی کواڵیتی باش بە کۆ لیتری 805 بۆ 810 دینارە و لە بەنزینخانەکانیش 820 بۆ 830 دینارە."
لە هەرێمی کوردستان جگە لە بەنزینی نۆرماڵ، بەنزینی موحەسەن و سوپەریش هەیە کە لیتری لە 900 بۆ 1300 دینارە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ