رووداو دیجیتاڵ
چوار رۆژە دەست بە نۆژەنکردنەوەی رێگەی سەرەکیی نێوان دهۆک - موسڵ کراوە. بەڕێوەبەری تەکنیکی لە بەڕێوەبەرایەتیی نۆژەنکردنەوەی رێگەوبان دەڵێت، تێچووی پڕۆژەکە حەوت ملیار و 300 ملیۆن دینارە.
هەینی 17-05-2024 هەڤاڵ عەلی، بەڕێوەبەری تەکنیکی لە بەڕێوەبەرایەتیی نۆژەنکردنەوەی رێگەوبانی دهۆک بە نایف رەمەزان، پەیامنێری تۆڕی میدیایی رووداوی راگەیاند، "نزیکەی 46 کیلۆمەتر لە دووسایدی رێگەی سەرەکیی دهۆک - موسڵ، نۆژەن دەکرێتەوە."
هەڤاڵ عەلی گوتیشی، حەوت ملیار و 300 ملیۆن دینار بۆ پڕۆژەکە تەرخان کراوە، کە لەسەر بودجەی وەبەرهێنانی وەزارەتی ئاوەدانکردنەوەیە.
رێگەی دووسایدی ئاڵوکا هاتووچۆی بازرگانیی نێوان هەرێمی کوردستان و عێراق و تورکیای پێدا دەکرێت و زۆر قەرەباڵخە. بەڕێوەبەری تەکنیکی لە بەڕێوەبەرایەتیی نۆژەنکردنەوەی رێگەوبان گوتی، "سەرجەم ئەو بارهەڵگرانەی لە تورکیاوە دێن، لەو رێگەیەوە دەچنە شارەکانی خواروو و نێوەڕاستی عێراق، بۆیە بە کوالێتییەکی باش نۆژەن دەکرێتەوە."
بە گوتەی هەڤاڵ عەلی، ماوەی تەواوکردنی پرۆژەکە 420 رۆژە و دەشڵێت، "دوای تەواوبوونی، تاوەکو سێ ساڵ ئەگەر هەر شوێنێکی رێگەکە تێکبچێت، نۆژەنکردنەوەی لە ئەستۆی بەڵێندەرەکەیە."
رۆژی 28-03-2024 ئەندازیار رێدیر سلێمان، جێگری بەڕێوەبەری گشتیی رێگەوبان و ئاوەدانکردنەوەی دهۆک، بە رووداوی گوت، سەرۆکوەزیرانی هەرێمی کوردستان رەزامەندیی لەسەر چەندین پڕۆژەی گرنگی کەرتی رێگەوبان داوە، کە گوژمەکەیان دەگاتە 162 ملیار دینار و گرفتی بەشێکی زۆری رێگە سەرەکییەکان چارەسەر دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ