هەڵەیەک روویدا! دووبارە هەوڵبدە
رووداو دیجیتاڵ
سوپای تورکیا گیانلەدەستدانی 9 گەریلای پارتی کرێکارانی کوردستان(پەکەکە)ی لە هەرێمی کوردستان راگەیاند. هەروەها هەپەگەش دەڵێت، سەربازێکی تورکیایان کوشتووە.
وەزارەتی بەرگریی تورکیا رۆژی دووشەممە، 16-12-2024، لە ئێکس، گیانلەدەستدانی 9 گەریلای پارتی کرێکارانی کوردستان(پەکەکە) لە رۆژانی 3-9ی مانگی کانوونی یەکەم لە ناوچەکانی خواکوڕک، مەتین و زاپ لە هەرێمی کوردستان لە رێگەی هێرشی ئاسمانییەوە راگەیاند.
وەزارەتەکە دەشڵێت، ئۆپەراسیۆنەکانیان لە هەر دۆخێکدا بەردەوام دەبن.
ناوەندی چاپەمەنی و راگەیاندنی هێزەکانی پاراستنی گەل (هەپەگە)ش بڵاویکردەوە، لە رۆژانی 6-9ی مانگی کانوونی یەکەم، هێرشی ئاسمانی و زەوینییان کردووەتە سەر هێزەکانی سوپای تورکیا لە ناوچەکانی خواکورک، مەتین و زاپ لە هەرێمی کوردستان و لە ئەنجامدا سەربازێکی تورکیایان کوشتووە و سێ پێگەی سەربازییان لەناوبردووە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە "چنگ- قوفڵ" کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد و تاوەکو ئێستاش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ