رێواز فایەق هۆشداری دەداتە ئەو پەرلەمانتارانەی بایکۆتی کۆبوونەوەکانی پەرلەمان دەکەن

 

رۆژی چوارشەممە 16-11-2022، لە کاتی دەستپێکردنی کۆبوونەوەی پەرلەمانی کوردستاندا، رێواز فایق، سەرۆکی پەرلەمانی کوردستان سەبارەت بەو پەرلەمانتارانەی رایانگەیاندووە کە بایکۆتی کۆبوونەوەکانی پەرلەمان دەکەن و ئەمڕۆ دووەم کۆبوونەوەیە بەشدارییان نەکردووە، گوتی: "لە ئەمڕۆوە هەموو ئەو بەڕێزانەی بەناوی بایکۆتەوە نایەنە هۆڵی دانیشتنی پەرلەمان، بە روونی دەیڵێین مادەی 22 و 23یان لەسەر جێبەجێ دەکەین کە دەڵێت: راگەیاندنی بایکۆت سەبارەت بە بابەتێکی دیاریکراوە و دەبێت لەنێو هۆڵی پەرلەمان بێت؛ نابێت پەرلەمانتاران بە نووسراو یان لە رێگەی دەزگاکانی راگەیاندووە بایکۆت رابگەیێنن؛ تەنیا ئەمڕۆ ئامادەنەبوون ناخوێنینەوە."

 

لە بڕگەی یەکەمی مادەی 22ی پەیڕەوی نێوخۆی پەرلەمانی کوردستاندا هاتووە: "ئەگەر بەبێ هۆیەکی رەوا، ئەندامی پەرلەمان ئامادەی دانیشتن نەبوو، سەرۆک بە نووسین سەرنجی رادەکێشێت؛ ئامادەنەبوون دووبارە بووەوە 5%ی مووچەکەی لەهەر دانیشتنێک کە ئامادەنەبووبێ دەبڕدرێت؛ ئەگەر ئامادەنەبوو لە سێ دانیشتنی یەک لەدوای یەکدا یان پێنج دانیشتنی پچڕ پچڕ لەماوەی یەک وەرزی یاساداناندا، ئەوە ئامادەنەبوونەکەی لە ماڵپەڕی پەرلەمان بڵاودەکرێتەوە، وێڕای بڕینی مووچەکەی لە ئەنجامی ئامادەنەبوونیدا. ئەگەر ئامادەنەبوونی دوای ئەوە دووبارە بوویەوە ئەوا سەرۆک دەتوانێت بابەتەکە بخاتە بەردەم پەرلەمان و پەرلەمانیش دەتوانێت بە دەنگی زۆرینەی رەهای ئەندامەکانی بە لەدەستدانی ئەندامێتی لەقەڵەمی بدات." 

 

جگە لە فراکسیۆنی یەکگرتووی ئیسلامیی کوردستان کە پێنج پەرلەمانتاری هەیە، شایان عەسکەری، پەرلەمانتاری گۆڕان و کازم فارووق، سەرۆکی پێشووی فراکسیۆنی نەوەی نوێ دەستلەکارکێشانەوەیان پێشکێشی سەرۆکایەتی پەرلەمانی کوردستان کردووە.

 

هەروەها سێ پەرلەمانتاری نەوەی نوێ بایکۆتی پەرلەمانیان راگەیاندووە و وەرگرتنی شایستە داراییەکانیان رەتکردووەتەوە؛ حەوت پەرلەمانتاری کۆمەڵی دادگەریی کوردستان، چوار پەرلەمانتاری فراکسیۆنی گۆڕان کە ئێستا لە دەرەوەی بڕیاری فراکسیۆنەکە کاردەکەن و پەرلەمانتارێکی "سەربەخۆ" بایکۆتیان راگەیاندووە، بەڵام وەرگرتنی شایستە داراییەکانیان رەتنەکردووەتەوە.

 

هۆکاری دەستلەکارکێشانەوە و بایکۆتکردنی پەرلەمانتاران، بە گوتەی خۆیان درێژکردنەوەی تەمەنی ئەم خولەی پەرلەمانی کوردستانە، کە 6-11-2022 کۆتایی دەهات، بەڵام رۆژی 9-10-2022 پەرلەمانی کوردستان بە دەنگی پەرلەمانتارانی پارتی، یەکێتی، بەشێکی گۆڕان و پێکهاتەکان تەمەنی یاسایی خۆی بۆ کۆتایی ساڵی داهاتوو درێژکردەوە.