رووداو دیجیتاڵ
نرخی بەنزینی نۆرماڵ لە هەولێر و دهۆک بۆ هەر لیترێک 50 دینار بەرزبووەتەوە. بازرگانێکی سووتەمەنی دەڵێت، نەناردنی بەنزین بۆ هەولێر هۆکاری سەرەکیی بەرزبوونەوەی نرخەکەیە.
لە هەرێمی کوردستاندا چەند جۆرێک بەنزین دەفرۆشرێن، بەڵام ئەوەی بە نۆرماڵ ناسراوە زۆرترین خواستی لەسەرە. جەنگی مەجید، بازرگانی سووتەمەنی و خاوەنی بەنزینخانە لە شاری هەولێر ئەمڕۆ شەممە بە تۆڕی میدیایی رووداوی گوت، "بەراورد بە چەند رۆژی رابردوو، نرخی یەک لیتر بەنزینی نۆرماڵ 50 دینار بەرزبووەتەوە."
چەند رۆژێک لەمەوبەر نرخی لیترێک بەنزینی کوالێتی بەرزی نۆرماڵ لەنێوان 710 بۆ 720 دینار بوو، لە بەنزینخانەکانیش لەنێوان 740 بۆ 750 دینار بوو، بەڵام ئێستا لیترێکی گەیشتووەتە 800 بۆ 810 دینار.
لەبارەی هۆکاری بەرزبوونەوەی نرخەکەوە جەنگی مەجید دەڵێت، "بەنزین کەمە و هاوردەکردنیشی لە پارێزگاکانی دیکەی عێراقەوە بۆ هەولێر قەدەخەیە؛ هەر کاتێکیش هاوردەکردن قەدەخە بکرێت و بەرهەمی نێوخۆش پێداویستی پڕنەکاتەوە، نرخ بەرز دەبێتەوە."
لە دهۆکیش نرخی لیترێک بەنزینی نۆرماڵ لە 750 دینارەوە بووەتە 800 دینار. موحسین تەها، بەڕێوەبەری نەوت و کانزاکانی دهۆک بە تۆڕی میدیایی رووداوی گوت، "جگە لە بەنزینی نۆرماڵی بازرگانی، حکومەت رۆژانە بەنزینی نۆرماڵی کوالێتی باش دابەش دەکات و لیتری بە 750 دینارە."
لە سلێمانی و هەڵەبجە نرخەکە جێگیرە
لە سلێمانی و هەڵەبجە پێشتر نرخی بەنزین لە هەولێر و دهۆک گرانتر بوو، ئێستا هاوتا بووەتەوە. بەهمەن شێخ قادر، گوتەبێژی بەنزینخانەکانی سلێمانی ئەمڕۆ شەممە بە تۆڕی میدیایی رووداوی گوت، "نرخی لیترێک بەنزینی نۆرماڵ 800 دینارە؛ پێشتریش بەو جۆرە و ئێستاش وەکو خۆی ماوەتەوە."
لە سلێمانییەوە بەنزینی بازرگانی دەبرێتە هەڵەبجەش. بە گوتەی بەهمەن شێخ قادر، لەو پارێزگایەش هیچ گۆڕانکاری لە نرخی ئەو بەنزینە بازرگانییەدا رووینەداوە.
جگە لەو بەنزینە نۆرماڵە بازرگانییە، لە شارە جیاکانی هەرێمی کوردستان رۆژانە بەنزینی نۆرماڵی حکومیی دابەش دەکرێت، گۆڕانکاری لە نرخی رووینەداوە و لیتری بە 750 دینارە.
جگە لە بەنزینی نۆرماڵ، بەنزینی موحەسەن و سوپەری بازرگانی لە هەرێمی کوردستان دەفرۆشرێن، نرخی لیترێکیان لەنێوان هەزار دینار بۆ هەزار و 300 دیناردایە و بەراورد بە نۆرماڵ خواستی کەمیان لەسەرە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ