رووداو دیجیتاڵ
ئاگر لە چیای ئەزمڕ کەوتووەتەوە و دیوی سیتەكیشی گرتووەتەوە. بەڕێوەبەری بەرگریی شارستانیی سلێمانی دەڵێت، "چەند تیمێكمان بۆ كۆنترۆڵكردنی ئاگرەكە ناردووە و ئەگەر رەشەبا رێگر نەبێت كۆپتەریش بەكاردەهێنین"."
شاهۆ عوسمان، قایمقامی قەزای چوارتا بە تۆڕی میدیایی رووداوی راگەیاند، بەیانیی ئەمڕۆ پێنجشەممە 13-07-2023 ئاگر لە چیای ئەزمڕ کەوتووەتەوە و دیوی ناحیەی سیتەكیشی گرتووەتەوە؛ ئاگرەکەش هێشتا كۆنترۆڵ نەكراوە.
قایمقامی قەزای چوارتا ئاماژەی بەوەش کرد، تیمەكانی بەرگریی شارستانی سەرقاڵی كۆنتڕۆڵكردنی ئاگرەكەن، "بەڵام رەشەبایەكی بەهێز هەیە و رێگرە لە كۆنتڕۆڵكردنی ئاگرەكە."
هەروەها عەمید دیار ئیبراهیم، بەڕێوەبەری بەرگریی شارستانیی سلێمانی بە رووداوی راگەیاند، چەندین تیمی بەرگریی شارستانی چوونەتە شوێنی ئاگرەكە و "ئەگەر پێویست بكات و رەشەبا رێگر نەبێت، هەلیکۆپتەریش بەكاردەهێنین بۆ كۆنتڕۆڵكردنی."
لەگەڵ كەوتنەوەی ئەو ئاگرە، رەشەبایەكی بەهێز لە سنووری شاری سلێمانی هەڵیکردووە، كە هۆكارە بۆ زیاتر تەشەنەكردنی ئاگرەكە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ