رووداو دیجیتاڵ
بەیانیی ئەمڕۆ بوومەلەرزەیەک بە گوڕی 4.2 پلەی ریختەر لە شاری تازاوا لە پارێزگای کرماشان لە رۆژهەڵاتی کوردستان روویدا و هێشتا زەرەر و زیانەکانی نەزانراون.
بەپێی راپۆرتی ناوەندی تۆمارکردنی بوومەلەرزەی ئێران، بوومەلەرزەکە کاژێر 3:57 خولەکی بەرەبەیانی ئەمڕۆ لە نزیک تازاوا و لە قوڵایی 8 کیلۆمەتردا تۆمارکراوە.
بوومەلەرزەکە جگە لە ناوچەی سەلاسی باوەجانی، لە شاری جوانڕۆش هەستی پێکراوە، بەڵام دامودەزگا پەیوەندیدارەکان هیچ زانیارییەکان لەسەر زەرەر و زیانەکان بڵاونەکردووەتەوە.
چەقی بوومەلەرزەکە لە نزیک ئەو شوێنە بوو کە 2017 پارێزگای کرماشانی هەژاند و زەرەر و زیانی زۆری بە بەشی رۆژئاوای پارێزگاکە گەیاند.
لە بوومەلەرزەی پاییزی ساڵی 2017ی ناوچەکانی رۆژئاوای پارێزگای کرماشان، لانیکەم 620 کەس گیانیان لەدەستدا، نزیکەی 12 هەزار و 800 کەس بریندار بوون. هەروەها 130 هەزارو 900 خانوو رووخان یان زیانیان بەرکەوت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ