لە کرماشان دوو کەس بە رووداوی هاتووچۆ گیانیان لەدەستدا

 

رووداوەکە نێوەڕۆی ئەمڕۆ دووشەممە، 11-12-2023، لەسەر رێگەی سەرەکیی سەرپێلی زەهاو بەرەو دەشتی زەهاو و لە نزیک گوندی زەرین جوب لە پارێزگای کرماشان لە نێوان دوو ئۆتۆمبێلی تایبەت لە جۆری پراید و پیژۆ روویداوە.

 

سەجاد کەرەمی، بەرپرسی فریاکەوتنی سەرپێلی زەهاو رایگەیاند، لە رووداوەکەدا کە لە نێوان گوندەکانی زەرین جوب و دەستەک روویداوە، دوو کەس گیانیان لەدەستداوە و سێ کەسیش بریندار بوون.

 

بە گوتەی سەجاد کەرەمی، دوای ئاگادارکرنەوەیان تیمەکانی فریاکەوتن و تەندروستیان ناردووە بۆ شوێنەکە و بریندارانی رووداوەکە گوازراونەتەوە نەخۆشخانەی شاری سەرپێلی زەهاو.

 

رۆژی شەممە، 09-12-2023ش، لە رووداوێکی دیکەی هاتووچۆدا لە سەرپێلی زەهاو دوو هاونیشتیمانی کورد گیانیان لەدەستدابوو و کەسێکیش بریندار ببوو.

 

ساڵانە ژمارەیەکی زۆری خەڵک بەهۆی رووداوەکانی هاتووچۆ لە رۆژهەڵاتی کوردستان و ئێران گیانیان لەدەستدەدەن. 

 

کەمال هادیانفەر، بەڕێوەبەری گشتیی پۆلیسی هاتووچۆی ئێران رۆژی 26-11-2023، لە لێدوانێکدا بۆ میدیای فەرمیی وڵاتەکەی رایگەیاندبوو، لە سەرەتای نەورۆزی ئەم ساڵەوە تائێستا زیاتر لە 12 هەزار کەس بە رووداوی هاتووچۆ گیانیان لەدەستداوە و 300 هەزار کەسیش بریندار بوون، کە ژمارەی قوربانیان بەراورد بە ساڵی رابردوو 7.3% زیادی کردووە.

 

کەمال هادیانفەر لە 30-7-2023شدا گوتبووی، رۆژانە لە نێوان 50 بۆ 60 کەس لە ئێران بە رووداوی هاتووچۆ گیانلەدەستدەدەن و هۆکاری سەرەکیی رووداوەکانیش بە پلە یەک نەبوونی مەرجی سەلامەتیی ئۆتۆمبێلەکانە.