رووداو دیجیتاڵ
سەرۆککۆماری عێراق بۆ بەشداریکردن لە کۆنفرانسێک، سەردانی هەولێر و دەکات و بڕیارە لەگەڵ سەرۆک بارزانی، سەرۆکی هەرێمی کوردستان و سەرۆکوەزیرانی هەرێمی کوردستان کۆببێتەوە.
لەتیف رەشید، سەرۆککۆماری عێراق ئێوارەی رۆژی شەممە دەگاتە هەولێر و بڕیارە لەلایەن نێچیرڤان بارزانی، سەرۆکی هەرێمی کوردستانەوە پێشوازیی لێبکرێت. سەردانەکەی بۆ بەشداریکردنە لە کۆنفرانسێکی ژینگەیی.
هاوڕێ تۆفیق، بەڕێوەبەری گشتیی پەیوەندییەکان و رێکخراوە نێودەوڵەتییەکان لە سەرۆکایەتیی کۆماری عێراق بە رووداوی راگەیاند، سبەی ئێوارە سەرۆککۆمار لە بەغداوە بەرەو هەولێر بەڕێدەکەوێت و بەشداری لە کۆنفرانسێکی ژینگەیی دەکات و گوتارێک لەبارەی ژینگە و ئاوی عێراق پێشکێش دەکات.
بەپێی زانیارییەکانی رووداو، سەرۆککۆماری عێراق جگە لە بەشداریکردن لە کۆنفرانسەکە، لەگەڵ سەرۆک بارزانی؛ نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکوەزیرانی هەرێمی کوردستان و قوباد تاڵەبانی، جێگری سەرۆکوەزیران بە جیا کۆدەبێتەوە.
رۆژانی شەممە و یەکشەممە لە زانکۆی کوردستان و هۆتێل رۆتانا، کۆنفرانسی وشکەساڵی و کاریگەریی گۆڕانی کەشوهەوا لەسەر سیاسەت، ئابووری و دیمۆگرافیای عێراق بەڕێوەدەچێت کە رووداو سپۆنسەری میدیایی دەکات.
بڕیارە لە دووەم رۆژی کۆنفرانسەکەدا لەتیف رەشید، سەرۆککۆماری عێراق و نێچیرڤان بارزانی، سەرۆکی هەرێمی کوردستان و بەرپرسی دیکە بەشداری بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ