هەڵەیەک روویدا! دووبارە هەوڵبدە
ئەو دوو منداڵەی لە کەرکووک دوای لەدایکبوونیان، دایک و باوکیان خۆیان شاردەوە و رووداو پێشانی دان، بڕیار درا بگوازرێنەوە هەرێمی کوردستان
رووداو دیجیتاڵ
دوو منداڵی بێ سەرپەرشت کە لە نەخۆشخانەی ئازادی کەرکووک ژیاون، دەگوازرێنەوە بۆ هەرێمی کوردستان. منداڵەکان کە بە ناوی خوازراوی شوشە و ئەژین ناسراون، لەدوای لەدایکبوونیان لە نەخۆشخانەکە جێهێڵدراون.
شوشە کە تەمەنی سێ ساڵ و دوو مانگە و ئەژین کە تەمەنی 11 مانگە، دوای لەدایکبوونیان دایکیان خۆی شاردووەتەوە و باوک و کەس و کاریان نادیارن. لە بەشی نەبەکامەکانی نەخۆشخانەکە، کارمەندەکان وەک منداڵی خۆیان پەروەردەیان کردوون.
ئەسما قاسم، کارمەندی تەندروستییە و دەڵێت: "ئەرکی کارمەندانی بەشی نەبەکامەکان بەرامبەر منداڵەکان تەنیا چاودێریکردن نەبووە. هاوشێوەی منداڵی خۆیان خەرجییان لە ئەستۆ گرتووە و رۆژانە پێداویستییەکانیان بۆ دابین کردوون."
دکتۆر فایزە خەتاب، پسپۆڕی نەخۆشییەکانی منداڵان، دەڵێت پێش گواستنەوەیان پشکنینی گشتی بۆ هەردوو منداڵەکە کراوە و سەلامەتن. بەڕێوەبەری نەخۆشخانەی ئازادی، دکتۆر بەڵێن عومەر دەڵێت گواستنەوەی منداڵەکان دوای راپۆرت و بەدواداچوونی رووداوەکە هاتووە.
جێهێشتنی نەخۆشخانە، هەرچەندە بۆ منداڵەکان هەنگاوێکە بەرەو داهاتوویەکی باشتر، بەڵام بۆ کارمەندەکان کە بوونەتە هاوڕێی رۆژانەیان، جیابوونەوەیان سەخت بووە و فرمێسکیان لە چاو دەچۆرێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ