راگەیێندراوی هاوبەشی تیمی حکومەتی عێراق و کوردستان: چارەسەری مووچە راگیراوەکان بکرێت

 

 

راگەیێندراوەکە ئەمشەوی دووشەممە، 9-9-2024، وەکو راگەیێندراوی هاوبەشی نێوان ئەنجوومەنی وەزاریی بۆ ئابووری و ئەنجومەنی ئابووری هەرێمی کوردستان بڵاوکراوەتەوە.

 

تێیدا هاتووە، "ئەنجوومەنی وەزاریی بۆ ئابووری بڕیاریدا بە پێشکەشکردنی راسپاردەیەک بۆ ئەنجوومەنی وەزیرانی فیدراڵ بۆ ئاڕاستەکردنی وەزارەتی دارایی فیدراڵ بۆ چارەسەرکردن و ناردنی مووچە راگیراوەکانی هەرێم [ـی کوردستان]، ئەوانەی بە هۆی تەواونەکردنی بایۆمەتری دوورخرابوونەوە".

 

راگەیێندراوەکە دەڵێت، "لە ماوەی دوو رۆژی کۆبوونەوەکاندا، کۆمەڵێک بابەتی جێی بایەخی هاوبەش لە نێوان حکومەتی فیدراڵ و حکومەتی هەرێمی کوردستان، لە کەشێکی راشکاوانە و ئەرێنیدا تاوتوێ کران، کە هەندێکیان بڕیاری هەنووکەییان لەبارەوە درا و ئەوانی تریش راسپاردە ئاراستەی ئەنجومەنی وەزیرانی فیدرال کرا، و جەخت لە بەردەوامبوونی گفتوگۆکان كرا بۆ چارەسەرکردنی ئەو پرسانەی کە پێویستییان بە کۆبوونەوە و دیداری زیاتر هەیە".

 

دوێنێ یەکشەممە، وەزارەتی دارایی هەرێمی کوردستان رایگەیاند، چاوەڕوان دەکرێت دەرئەنجامی کۆبوونەوەکان لە بەرژەوەندی هەرێمی کوردستان بێت.

 

لە لایەکی دیکە، بەگوێرەی راگەیێندراوەکەی ئەمڕۆ هەولێر و بەغدا، تیمەکانی هەردوولا هەروەها گفتوگۆیان لەبارەی هەندێک پرسی پەیوەندیدار بە رۆژنامەی کشتوکاڵی، مۆڵەتی هەناردە و هاوردەکردن، مۆڵەتی کارگەکان، تۆمارکردنی کۆمپانیاکان، پۆلێنکردنی بەڵێندەران، دەروازە سنوورییەکان، گومرگ، دۆسییەی نەوت و وزە و کەرتی بانکی کردووە.

 

ئەوەش هاتووە، "راسپاردەیەکی دیکەی ئەنجوومەنی وەزاریی بۆ ئابووری، بەردەوامبوونی کارکردنی لیژنە هاوبەشەکانی نێوان وەزارەت و کەرتە پەیوەندیدارەکانە بۆ تەواوکردنی ئەو ئەرکانەی پێیان سپێردراوە لەپێناو گەیشتن بە لەیەکتێگەیشتنی هاوبەش کە لە بەرژەوەندی هەموو هاووڵاتییانی عێراقدا بێت".

 

کۆبوونەوەکەی ئەمڕۆ، کۆبوونەوەی لیژنەکان بوو و لە کۆتاییدا لەسەر چەند راسپاردەیەک رێکەوتن.

 

راگەیێندراوەکە دەشڵێت، ئەنجوومەنی وەزاریی پێشنیاری ئەنجامدانی کۆبوونەوەیەکی تایبەت و لە ئاستێکی باڵادا دەکات بۆ گفتوگۆکردن لەبارەی دۆسییەکان نەوت، وزە، دەروازە سنوورییەکان و گومرگ؛ لە کۆتاییدا بانگهێشتی ئەنجوومەنی ئابووری هەرێمی کوردستان کرا بۆ ئەنجامدانی کۆبوونەوەیەکی هاوبەش لەگەڵ ئەنجوومەنی وەزاریی بۆ ئابووری، لە شاری بەغدا.