رووداو دیجیتاڵ
تەرمی کۆڵبەرێک لە ناوچە سنوورییەکانی شاری پاوە لە پارێزگای کرماشانی رۆژهەڵاتی کوردستان دۆزرایەوە. ئەو شەوی پێشتر لەگەڵ کۆمەڵێک کۆڵبەر تەقەیان لێکرابوو و لە ئەنجامدا حەوت کۆڵبەر بریندار ببوون.
رۆژی 07-08-2023 دوای ماوەیەکی زۆر گەڕان، تەرمی کۆڵبەرێک بەناوی ئاسۆ کەریمی لە یەکێک لە باخەکانی ناوچە سنوورییەکانی شوشمێ سەر بە شاری پاوە دۆزرایەوە و دەگوترێت، لەبەر ئەوەی خوێنی زۆری لێ رۆیشتبوو، گیانی لەدەستداوە.
بەگوێرەی سەرچاوە خۆجێییەکان، ئەو کۆڵبەرە دوای ئەوەی بریندار ببوو، خۆی گەیاندبووە یەکێک لە باخەکانی ناوچەی شوشمێ، بەڵام لەبەر قووڵیی برینەکەی و لەبەر ئەوەی خوێنێکی زۆری لێ رۆیشتبوو، گیانی لەدەستدابوو.
ئاسۆ کەریمیی تەمەن 39 ساڵ، خاوەن هاوژین و خەڵکی شاری پاوە بوو. ئەو لەگەڵ کۆمەڵێک کۆڵبەری دیکە، رۆژی یەکشەممە لەلایەن هێزەکانی پاسەوانی سنووری ئێرانەوە تەقەیان لێکرا.
لەو رووداوەدا حەوت کۆڵبەری خەڵکی شارەکانی پاوە، جوانڕۆ و سەلاسی باوەجانی لە پارێزگای کرماشان بریندار بوون و بەپێی راپۆرتی رێکخراوەکانی مافی مرۆڤ، تەندروستیی هەندێک لەوان جێگیر نییە.
ساڵانە لە ناوچە سنوورییەکانی نێوان رۆژهەڵاتی کوردستان و هەرێمی کوردستان چەندین کۆڵبەر تەقەیان لێ دەکرێت.
نەوید سەحرایی، داواکاری پاوە رۆژی 02-05-2022 گوتی، ئەو کۆڵبەرانە گواستنەوەی کەلوپەلیان بە شێوەی قاچاخ پەرەپێداوە و هەروەها ئاسایش و ئارامیی خەڵکیان تێکداوە.
ئەو کات داواکاری پاوە گوتی، لە خاڵەکانی پشکنینی پاوەدا رێگری لەو کۆڵبەرانە دەکرێ و رێکاری تووندی یاسایی بەرامبەر ئەو شۆفێرانە دەگیرێتەبەر کە کۆڵبەر بۆ سنوورەکە دەگوازنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ