سەرۆککۆماری عێراق لە سلێمانییەوە قسە دەکات
رووداو دیجیتاڵ
سەرۆککۆماری عێراق دەڵێت، پەیوەندیی نێوان حکومەتی هەرێمی کوردستان و حکومەتی عێراق بەرەو ئاساییبوونەوە دەڕوات؛ ئاماژە بەوەش دەکات، دۆخی مووچەی فەرمانبەرانی هەرێمی کوردستان باشتر دەبێت.
ئەمڕۆ (دووشەممە، 08-04-2024) لەتیف رەشید، سەرۆککۆماری عێراق لە کۆنگرەیەکی رۆژنامەڤانیدا لە سلێمانی رایگەیاند، ''پەیوەندیی نێوان هەرێمی کوردستان و بەغدا بەرەو ئاساییبوونەوە دەڕوات.''
لەتیف رەشید لەبارەی دۆخی مووچەخۆرانی هەرێمی کوردستانیش گوتی، ''دۆخی مووچەی فەرمانبەران باشتر دەبێت و هیوامان وایە ئەم هەنگاوانەی لەم دواییانەدا نراون، هەموومان کەڵکیان لێ وەربگرین و پەیوەندیی هەرێمی کوردستان و عێراق بەهێزتر بێت.''
سەرۆککۆماری عێراق پێشنیاز دەکات بۆ باشترکردنی پەیوەندییەکان، هەردوو حکومەت پێکەوە و بە هاوئاهەنگیی یەکدی هەوڵی چارەسەرکردنی کێشەکان بدەن.
قسەکانی لەتیف رەشید لەکاتێکدان رۆژی شەممە، 6ـی نیسانی 2024، نێچیرڤان بارزانی، سەرۆکی هەرێمی کوردستان بۆ دیدار لەگەڵ محەممەد شیاع سوودانی، سەرۆکوەزیرانی عێراق؛ سەرۆککۆماری عێراق و بەشداربوون لە کۆبوونەوەی چوارچێوەی هاوئاهەنگی و هاوپەیمانیی بەڕێوەبردنی دەوڵەت سەردانی بەغدای کرد و ئەنجامی کۆبوونەوەکانیش بۆ چارەسەرکردنی کێشەکانی بودجە، مووچە و پەیوەندییەکانی نێوان هەرێمی کوردستان و عێراق بە ئەرێنی دانران.
نزیکبوونەوەی هەولێر و بەغدا گوشاری سەر مووچەخۆرانیشی کەمکردووەتەوە. هەفتەی رابردوو دابەشکردنی مووچەی مانگی شوباتی مووچەخۆرانی هەرێمی کوردستان تەواوبوو و بڕیارە ئەم هەفتەیەش دابەشکردنی مووچەی مانگی ئادار تەواو بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ