هەڵەیەک روویدا! دووبارە هەوڵبدە
رووداو دیجیتاڵ
بە دنیایەک خۆشەویستییەوە چاوەڕوان بوو منداڵی چوارەمی لە ئامێز بگرێت، بەڵام رووداوێک وایکرد بۆ هەمیشە لەگەڵ کۆرپەکەی بمێنێتەوە و هاوژین و سێ منداڵەکەی دیکەی بەجێبهێڵێت.
دنیا تەمەنی 30ساڵ بوو، لە گوندی گۆرانکێی گەورەی سەر بە قەزای ئاکرێ دەژیا. سێ منداڵی هەبوو و شەش مانگ بوو بە منداڵی چوارەمی دووگیان بوو. لەکاتی هەڵخستنی جل لەسەر بانی ماڵەکەیدا کارەبا لێیدەدا و لەگەڵ کۆرپەکەی پێکەوە گیانیان لەدەستدا.
سەفین ئەنوەر یاسین، کە پێشمەرگەیە و هاوسەری دنیایە، لەدەستدانی هاوژینەکەی وەک خۆی دەڵێت خەمێکی گەورەی لەسەر دڵی داناوە. ئەو باسی چۆنییەتی رووداوەکەی بۆ رووداو کرد و دەڵێت، لەکاتی رووداوەکە لە ماڵ نەبووە، کاژێر نزیکەی دووی دوا نیوەڕۆ بوو، کاتێک گەڕاوەتەوە ماڵەوە دونیای نەبینیوە. دەڵێت: "بانگم کرد بەڵام وەڵامی نەبوو، دەمێک گەڕام لە ماڵەکە نەمبینی، دواجار چوومە سەربانی ماڵەکە و بینیم کەوتووە و کارەبا لێیداوە، بردمانە نەخۆشخانە بەڵام بەر لەوەی بگات گیانی لەدەستدابوو."
بەگوتەی سەفین ئەنوەر، کارەبایان لە موەلیدە راکیشاوە و کارەباکە بەر تەلی هەڵخستنی جلەکان کەوتووە و لەبەر ئەوەی تەڕ بووە بووەتەهۆی ئەوەی لەکاتی هەڵخستنی جلەکان، کارەبا لە هاوژینەکەی بدات.
دنیا جگە لەوەی دووگیان بوو ، سێ منداڵی دیکەی هەبوو کە تەمەنیان ( 4ساڵ، 6 ساڵ، 7 ساڵ) بوو، ماوەی 8 ساڵ بوو هاوسەرگیریی کردبوو و وەک مێردی دەڵیت، ئەوان زۆر بەختەوەر بوون و هەرگیز کیشەیان نەبووە، ماڵی باوکی زۆر خۆشیان ویستووە و لە گوندەکەش خۆشەویست بووە.
ژنەکە سێ کوڕی لە دوای خۆی جێهێشت، ئەو منداڵەیشی بڕیاربوو لەدایک ببێت بە گوتەی کەسوکارەکەی کچ بووە. بەڵام ئەویش گیانی لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ