لەسەر سنووری بانە بە گوللـەی هێزەکانی پاسەوانی سنووری ئێران، کۆڵبەرێک کوژرا

بەپێی زانیارییە خۆجێییەکان، رۆژی دووشەممە، 4ـی تشرینی دووەمی 2023، هێزەکانی پاسەوانیی سنووریی ئێران لە سنووری بانە تەقەیان لە ژمارەیەک کۆڵبەر کردووە و بە هۆیەوە کۆڵبەرێک بە ناوی ئەهوەن دەشتی، تەمەن 28 ساڵان و خەڵکی گوندی میرەدێی سەر بە شاری بانە کوژراوە.

 

بەپێی رێکخستنەکانی مافی مرۆڤی رۆژهەڵاتی کوردستان، لە ماوەی نۆ مانگی ئەم ساڵدا تەنیا لە سنووری بانە 17 کۆڵبەر کوژراون.

 

بەپێی راپۆرتی کۆڵبەرنیوز، لە 70 رۆژی رابردوودا 9 کۆڵبەر لە ناوچە سنوورییەکانی رۆژهەڵاتی کوردستان کوژراون و 145 کۆڵبەری دیکەش بریندار بوون.

 

بەشی زۆری ئەو کەسانە لە ناوچە سنوورییەکانی هەنگەژاڵی بانە لە پارێزگای سنە و سنووری نەوسوود لە پارێزگای کرماشان تەقەیان لێکراوە.

 

حکومەتی ئێران لە ماوەی رابردوودا سێ دەروازەی کۆڵبەریی لە پارێزگاکانی سنە و کرماشاندا کردووەتەوە و بەگوتەی بەرپرسان، هەوڵدەدەن دەروازەی کۆڵبەریی دیکەش بکەنەوە، بەڵام لەم دەروازانەوە مۆڵەت دەدرێت تەنیا هەندێ کەلوپەلی رێپێدراو هاوردە بکرێت.

 

کۆڵبەرەکان لەپێناو بڕە پارەیەکدا کاڵا و کەلوپەل لە ناوچە سنوورییەکانەوە ئاودیوی رۆژهەڵاتی کوردستان دەکەن. وەزارەتی ناوخۆی ئێران پێشتر هۆشداری داوە کە نابێت هیچ کەسێک سنوور ببەزێنێت.

 

تەقەکردن لە کۆڵبەران و کوشتنیان لەسەر سنوورەکانی رۆژهەڵاتی کوردستان لە کاتێکدایە کە قاسم رەزایی، جێگری فەرماندەی پۆلیسی ئێران، رۆژی 22-10-2023، لە سەردانێکدا بۆ شاری پاوە لە پارێزگای کرماشان رایگەیاند، "کۆڵبەری کارێکی نایاساییە و لە ئەگەری هەر هاتووچۆیەکی نایاسایی لە سنوورەکان، هێزەکانی پاسەوانیی سنووری ئێران رووبەرووی دەبنەوە."