وێنەی ئەو سێ برایە.
رووداو دیجیتاڵ
سێ برا لە گوندی شیوەگەرمکی سنووری سیدەکان دوای تەمەنی 20 ساڵی لە دەست و قاچ کەوتوون. بەپێی گوتەی پزیشک، نەخۆشییەکە بۆماوەییە. باوکی سێ برا نەخۆشەکە دەڵێ، پێشتر هیچ کەسێک لە ماڵباتەکەم ئەو نەخۆشییەی نەبووە.
عوزێر حوسێن، تەمەنی 53 ساڵە و 20 ساڵە جووڵەی دەست و قاچی نەماوە، پێشتر شوان بووە. خالیس حوسێن، تەمەنی 38 ساڵە؛ 15 ساڵە جووڵەی دەست و قاچی لەدەستداوە، پێشتر شوان بووە. خەفەت حوسێن، تەمەنی 29 ساڵە؛ 10 ساڵە لە دەست و قاچ کەوتووە، پێشتر قوتابی پۆلی 12ـی ئامادەیی بووە، بەهۆی نەخۆشییەکەیەوە لە خوێندن دابڕاوە.
هەر سێ برا نەخۆشەکە ژنیان نەهێناوە. خەفەت حوسێن، لە بەرنامەی بەرپرسیاری تۆڕی میدیایی رووداو گوتی: "دۆخی هەرسێکمان زۆر خراپە و بەردەوام لە ماڵ دەمێنینەوە. هاوژینی یەکێک لە براکانم خزمەتمان دەکات."
هەر سێ برا نەخۆشەکە پێشتر بە شاخ و دۆڵەکانی گوندی شیوەگەرمک شوانییان کردووە. عوزێر حوسێن، بە رووداوی گوت: "شوان بووم لەم چیاو چۆڵانە، ساخ و بێ کێشەبووم؛ دواییش وام لێهات. دەمارەکانی رانم لە ناوقەد بۆ خوارەوە کار ناکەن و وەکو مردوون، لەسەر دەستان دەچمە سەر ئاو و دێمەوە."
جووڵە و هاتن و چوونیان ئاستەمە و بەردەوام قاچەکانیان ئازاری هەیە. دوورترین شوێن کە پێی دەگەن بەر دەرگای ماڵەکەیانە ئەویش بە ئەستەم. خالیس حوسێن، بە رووداوی گوت: "زۆر باش بووم، بێ گۆچان دەچوومە سەر چیا، ئێستاش تا تەمەنمان دەروات زیاتر دەکەوین."
سەرەتای دروستبوونی نەخۆشیەکەیان بە سڕبوونی قاچەکانیان هەست پێکردووە. لەگەڵ هەڵکشانی تەمەن جووڵەیان کەمتر دەبێتەوە و ناتوانن بە هاوسەنگی هەنگاوبنێن و بوەستن.
بۆ چارەسەر لەکوردستان زۆر دکتۆریان بینیوە. دەرکەوتووە نەخۆشییەکەیان تێکشکانی خانەکانی دەمارە و لە مێشکەوە فەرمانەکان بە شێوەیەکی ئاسایی ناگەن بە ماسوولکەکانی دەست و قاچیان و پێیانگوتراوە لە هیندستان چارەسەریان هەیە.
حوسێن حەمەدەمین، باوکی سێ برا نەخۆشەکە، لە بەرپرسیار گوتی: "کەمدەرامەتم و توانام نییە سێ کوڕەکەم ببەمە دەرەوەی وڵات، داوا لە خێرخوازان دەکەم هاوکاریی سێ کوڕە نەخۆشەکەم بکەن."
پسپۆڕێکی چارەسەری سرووشتی و فیزیایی، نەخۆشی ئەو سێ برایە بە "تێکشکانی خانەکانی مێشک" ناودەبات. دکتۆر لوقمان نەبی، بە رووداوی گوت: "خانەکانی مێشک وردە وردە لەنێودەچن و فەرمان بە ماسوولکەکانی قاچیان نادات بەشێوەیەکی ئاسایی."
نەخۆشییەکە "بۆماوەییە". دکتۆر ئازاد حەسەن، پسپۆڕی نەشتەرگەریی مێشک و دەمار، لە بەرپرسیار گوتی: "نەخۆشییەکە پەیوەندی بە جیناتی خێزانەکەیەوە هەیە، دەکرێ حاڵەتەکە لە باوانیانەوە هەبێ." باوکی سێ برا نەخۆشەکە دەڵێ، پێشتر هیچ کەسێک لە ماڵباتەکەم ئەو نەخۆشییەی نەبووە.
بە گوتەی پسپۆڕێکی نەشتەرگەریی ئێسک و شکان و گۆڕینی جومگە، چارەسەریان لە سەنتەرێکی تایبەتمەند دەکرێ. دکتۆر ئامانج گەردی گوتی: "ماسوولکەکانی لەش فەرمان لە کۆئەندامی مێشکەدەرمار وەردەگرن و لە رێگەی دەمارەوە دەگوازرێتەوە، نەخۆشییەکەیان بۆماوەییە و کۆئەندامی دەماریان بەپێی پێویست فەرمان بۆ ماسوولکەکان نانێرێ ئەمەش وایکردووە نەتوانن لەسەر قاچیان بوەستن."
دایکیان لەژیان نەماوە، لەلایەن باوک، خوشک و هاوژینی یەکێک لە براکانیان خزمەت دەکرێن. لە ماڵەکە لە کۆی شەش برا، سێیان ئەو نەخۆشییەیان گرتووە. تەنیا داهات بۆ خەرجیی دەرمان و سەردانی پزیشک، مووچەی 150 هەزار دیناریانە کە لە چاودێریی کۆمەڵایەتیی سۆران وەریدەگرن.
لە سنووری سۆران 4400 نیڤشکان مووچەی مانگانە وەردەگرن. تووران خدر، بەڕێوەبەری چاودێریی کۆمەڵایەتیی سۆران، بە رووداوی گوت: "ئاگاداری دۆخی ئەو سێ برا نەخۆشەین، تەنیا دەتوانین مووچەیان پێبدەین. سەردانمان بکەن بەپێی راپۆرتی پزیشکی نووسراوی پشتگیرییان بۆ وەزارەت بەرز دەکەینەوە وەک حاڵەتی تایبەت هەژماربکرێن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ